Prezident İlham Əliyevin tapşırıqları əsasında son 4 ildə
minimum əməkhaqqı 2,3 dəfə, pensiyaların minimum məbləği 2,2 dəfə
artırılıb.
AzerTimes-ın məlumatına görə, bunu əmək və əhalinin sosial müdafiəsi
nazirinin müavini Anar Əliyev bu gün keçirilən brifinqdə deyib.
Nazir müavini bildirib ki, son 4 ildə müavinət və təqaüdlərdə
orta hesabla 2,5-3 dəfədən çox artım baş verib.
“2018-ci ildən sonrakı dövrdə dövlət başçısının imzaladığı fərman
və sərəncamlarla ölkə əhalisinin böyük bir hissəsini əhatə edən 3
sosial islahat paketi icra olunub.
2018-2021-ci illərdə əmək müqavilələrinin sayında 30 faiz və ya 400
minə yaxın, illik əməkhaqqı fondunda 2 dəfədən çox artım baş
verib”, – deyə nazir müavini bildirib.
O qeyd edib ki, 2021-ci ildə 16 mindən çox şəxs özünüməşğulluq
proqramına cəlb olunub ki, bu da proqramın icrasına başlanıldığı
2017-ci illə müqayisədə 13,8 dəfə çoxdur.
Ümumilikdə son 4 ildə və cari ilin ilk rübündə 44 mindən çox şəxs
özünüməşğulluq proqramına cəlb edilib.