Böyük Britaniya və Şimali İrlandiya Birləşmiş Krallığının kral
ailəsinin üzvlərinin şərəfinə ənənəvi olaraq təşkil edilən “Vindzor
Kral Atçılıq Şousu” 2022-ci ilin 12 may tarixində start
götürüb.
Dövlət Sərhəd Xidmətinin Mətbuat Mərkəzindən AzerTimes-a verilən məlumata görə, 2012-ci
ildən etibarən ölkəmizin dəvət aldığı bu beynəlxalq atçılıq şousu
qədim və unikal mədəniyyətimizin tanıdılması üçün son dərəcə
əhəmiyyətli platformaya çevrilmiş, nümayəndə heyətimizin hər il
nümayiş etdirdiyi bənzərsiz şou-proqramlar və performanslar bu
möhtəşəm tədbirin ayrılmaz hissəsi kimi qəbul edilmişdir.
Milli sərvətimiz olan Qarabağ atlarının qorunub saxlanılmasına
və məşhurlaşdırılmasına Azərbaycan Respublikasının Prezidenti
cənab İlham Əliyevin ali dəstəyi sayəsində son illər ərzində
mili at cinslərimizin Azərbaycan brendi kimi dünyada tanıdılması
istiqamətində əhəmiyyətli işlər görülür. Bu tədbirlər sırasında
“Vindzor Kral Atçılıq Şousu”nda Qarabağ atlarının füsünkar
gözəlliyinin nümayiş etdirilməsi xüsusi yer tutur.
Cari ildəki “Vindzor Kral Atçılıq Şousu”nda ölkəmizi növbəti
dəfə Dövlət Sərhəd Xidmətinin süvarilər dəstəsi və rəqs ansamblı
təmsil etmiş, artıq ənənəvi olaraq öz çıxışları ilə hər kəsi
valeh etməyi, hər bir tamaşaçını heyrətləndirməyi bacarmışlar.
Təmsilçilərimizin milli geyimlərimizdə çıxışları xüsusilə
fərqlənmiş, çoxsaylı tamaşaçı kütləsinin xüsusi rəğbətini
qazanmışdır.
Cari ildə Kraliça II Yelizavetanın taxta çıxmasının 70-ci
ildönümünə həsr olunmuş bu tədbir üçün nümayəndə heyətimiz
tərəfindən xüsusi olaraq “Odlar Yurdu” adlı şou-kompozisiya
hazırlanmışdır. Azərbaycan xalqının çoxsaylı maddi və mənəvi
sərvətlərini ifadə edən bu kompozisiyanın əsasını artıq Vindzor
tamaşaçılarına çox yaxşı tanış olan, burada özünə heyranlar ordusu
qazanmış, çılğınlığı və gözəlliyi ilə seçilən Qarabağ atları, eləcə
də zərif Azərbaycan rəqsləri və ecazkar milli musiqimiz təşkil
etmişdir.
Heydər Əliyev Fondunun dəstəyi, Azərbaycan Respublikası Atçılıq
Federasiyasının təşkilatçılığı ilə hazırlanmış şou-kompozisiyanın
quruluşçu rejissoru – Azərbaycan Respublikasının əməkdar artisti
Nicat Kazımov, xoreoqrafı – Azərbaycan Respublikasının əməkdar
artisti Fərid İbrahimovdur.
Milli musiqi alətlərimiz tütək, zurna, balabanda ifa olunan
“Qarabağ cəngisi”nin bənzərsiz sədalarından, “Sərhədçi” rəqs
ansamblının hərarətli rəqslərindən, Dövlət Sərhəd Xidmətinin
süvarilər dəstəsinin Qarabağ atları üzərində igidlik və hünər
nümunələrindən, alov püskürənlərin qeyri-adi perfomanslarından
ibarət şou-kompozisiya Böyük Britaniya tamaşaçısını sözün əsl
mənasında ovsunlamışdır. 6 dəqiqə davam edən şou müddətində
süvarilərimizin başları üzərində Azərbaycan Respublikasının və
Böyük Britaniyanın dövlət bayraqlarını dalğalandırmaları diqqəti
xüsusi cəlb etmişdir.
Şou-proqram tədbir iştirakçıları tərəfindən böyük coşğu ilə
qarşılanmış, böyük tamaşaçı kütləsinin zövqünü oxşamış,
tamaşaçılar ayağa qalxaraq təmsilçilərimizi sürəklə
alqışlamışlar.