Ermənistanda antirusiya əhval-ruhiyyəsi yenidən yüksəlib. İctimai sektorun nümayəndələri yaxın vaxtlarda rus sülhməramlı kontingentin müvəqqəti yerləşdirmə mərkəzinin qarşısında sülhməramlıların komandiri Andrey Volkovun istefasını tələb edəcək etiraz aksiyaları keçirməyə hazırlaşırlar.
AzerTimes xəbər verir ki, bu barədə “Hraparak” qəzeti məlumat yayıb.
Məlumata görə, aksiyaya səbəb üç erməni “polisi”nin (Xankəndidəki separatçı rejimin terrorçuları – red.) öldürülməsidir.
Qeyd edək ki, Xankəndi-Xəlfəli-Turşsu torpaq yolundan istifadə edilməklə Ermənistandan silah-sursatın və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınması barədə məlumatlar daxil olub. Martın 5-də səhər saatlarında daxil olmuş məlumatın yoxlanması məqsədilə qanunsuz hərbi daşımalar həyata keçirən nəqliyyat vasitələrinin Azərbaycan Ordusunun bölmələri tərəfindən saxlanılaraq yoxlanılmasına cəhd göstərilib. Qarşı tərəfdən atəş açılıb. Nəticədə Ordumuzun iki əsgəri – Əlibəyli Şəhriyar Ramiz oğlu və Hüseynov Eşqin Cəmil oğlu şəhid olublar. Erməni separatçıların 3 zabiti məhv edilib, bir nəfər isə yaralanıb.