Türkiyədə bələdiyyə seçkilərində Yenidən Rifah Partiyası (YRP) Cümhur İttifaqı ilə birgə hərəkət etməyəcək.
AzerTimes xəbər verir ki, bunu YRP-nin sədri Fateh Ərbakan deyib.
“Bununla bağlı partiya daxilində müzakirələr apardıq. Müzakirələrin nəticəsində bir neçə səbəb bizi bu addımı atmağa vadar etdi. İlk öncə bələdiyyə seçkilərinin “14 May” seçkilərindən fərqləndiyini gördük. Ötən ilki prezident seçkilərində millətimiz bizdən fədakarlıq istədi və biz də partiya olaraq Cümhur İttifaqına qoşulduq. Ancaq bələdiyyə seçkilərində ayrı yolla davam etməyimiz daha münasibdir. İkinci səbəb də təşkilatlarımızın 95 faizi ittifaqdan ayrılmağımızı istəyirdi. Digər səbəblərdən biri də hakim AKP-nin bizə ədalətli təkliflərlə gəlməməsidir. Buna görə də seçkilərdə Cümhur İttifaqından ayrılmaq, Ankara, İstanbul və İzmirdə öz namizədlərimizi irəli sürmək qərarına gəldik. Bu 3 şəhər üzrə namizədlərimizi fevralın 10-da Ankarada açıqlayacağıq”, – partiya sədri qeyd edib.