Təbrizin “Traktor” klubunun baş direktoru Eyub Behtadj futbolçuları Höccət Haqverdinin “Neftçi”yə keçəcəyinə dair məlumatlara münasibət bildirib.
AzerTimes Qol.az-a istinadən xəbər verir ki, klub rəsmisi bu haqda İranın “Khabarvarzeshi” nəşrinə danışıb. O, H.Haqverdinin klubdan ayrıldığını təsdiqləyib.
Onun sözlərinə görə, onlar H.Haqverdidən klub qarşısında öhdəliyi yerinə yetirməsini gözləyiblər:
“O, Azərbaycan millisinin düşərgəsində olduğundan “Traktor”un Türkiyədəki təlim-məşq toplanışında iştirak etmədi. Təbrizə qayıtdıqdan sonra isə bildirdi ki, zədə alıb. Höccət klubun müşahidəsi altında müalicə olundu, yekunda isə zədəsini sağalda bilmədi”.
Eyub Behtadj deyib ki, “Traktor”un yeni baş məşqçisi, ispan Pako Xemez gəldikdən sonra H.Haqverdiyə məşqlərdə iştirak şansı verməyib. “Ona görə də bu oyunçununun klubdan getməsi 100 faiz idi. İndi biz Xemezdən həmin futbolçunun yerinə kimi gətirəcəyini gözləyirik”.
Xatırladaq ki, H.Haqverdinin qış transfer pəncərəsi dövründə “Neftçi”yə keçdiyinə dair xəbərlər yayılıb. Hələlik klub onun transferi ilə bağlı rəsmi açıqlama verməyib.