Bu gün Bakıda yaşadığı evinin qarşısında güllələnən Milli Məclisin deputatı Fazil Mustafanın vəziyyəti stabil olaraq qiymətləndirilir.
Bu barədə AzerTimes-a TƏBİB-dən bildirilib.
“TƏBİB-in tabeliyindəki Bakı Şəhəri Təcili və Təxirəsalınmaz Tibbi Yardım Stansiyasına Milli Məclisin deputatı Fazil Mustafanın xəsarət alması barədə saat 21:55 radələrində çağırış daxil olub, dərhal həkim briqadası cəlb edilib.
Sağ çiynin, sağ budun yuxarı üçdə birinin güllə yarası diaqnozu ilə hazırda ona zəruri tibbi xidmətlərin göstərilməsi davam edir. Vəziyyəti stabil olaraq qiymətləndirilir. Həyati təhlükəsi yoxdur”, – məlumatda deyilir.
Qeyd edək ki, bu gün axşam saatlarında millət vəkili Fazil Mustafa Zabrat qəsəbəsində yaşadığın evin qarşısında güllələnib. Ona avtomat silahdan çoxsaylı atəş açılıb. Güllələrdən ikisi millət vəkilinə dəyib.