Talibanın ali lideri Heybətullah Axundzadə may ayında Qətərin Baş naziri Məhəmməd bin Əbdül Rəhman əs-Sani ilə gizli danışıqlar aparıb.
AzerTimes xəbər verir ki, bu barədə “Röyters” mənbəyə istinadən məlumat yayıb.
“Danışıqların əsas mövzusu beynəlxalq ictimaiyyətlə münasibətlərdə yaranmış gərginliyin aradan qaldırılması olub. Şeyx Məhəmmədin Taliban lideri ilə müzakirə etdiyi məsələlər arasında qızların təhsili və qadınların işə götürülməsinə qoyulan qadağanın aradan qaldırılması zərurəti də olub”, – mənbə bildirib.
Vurğulanır ki, görüş mayın 12-də Əfqanıstanın cənubundakı Qəndəhar şəhərində baş tutub.
Qeyd olunur ki, bu hadisələr Əfqanıstan hakimiyyətinin ölkənin təcridinə son qoymağa kömək edəcək yolları müzakirə etməyə hazır olduğunu göstərir.