Özbəkistan Kommunist Partiyasının keçmiş rəhbəri, SSRİ Ali Sovetinin Millətlər Şurasının sədri Rafiq Nişanov 96 yaşında vəfat edib.
AzerTimes xəbər verir ki, bu barədə Özbəkistan mediası məlumat yayıb.
Qeyd edilir ki, 1989-cu ildən Moskvada yaşayan Nişanov xaricdə dünyasını dəyişib. İndi onun harada dəfn olunacağına ailəsi qərar verəcək.
Xatırladaq ki, Nişanov 1926-cı il yanvarın 15-də anadan olub. Tarix elmləri namizədi olub. 1951-ci ildən Özbəkistan SSR-də partiya işində çalışıb. 1970-ci ildə SSRİ-nin Şri-Lankada və eyni zamanda Maldiv Respublikasında fövqəladə və səlahiyyətli səfiri kimi diplomatik fəaliyyətə keçib, 1978-ci ildən isə SSRİ-nin İordaniyadakı səfiri işləyib.
1986-cı il dekabrın 9-dan 1988-ci il aprelin 9-dək Özbəkistan SSR Ali Soveti Rəyasət Heyətinin sədri, eyni zamanda 1987-ci il iyunun 29-dan 1988-ci il mayın 24-dək SSRİ Ali Soveti Rəyasət Heyəti sədrinin müavini olub. 1988-ci ilin yanvarında Özbəkistan SSR Kommunist Partiyası Mərkəzi Komitəsinə rəhbərlik edib, 1988-ci il may ayının sonundan 1989-cu il mayın 25-dək SSRİ Ali Soveti Rəyasət Heyətinin üzvü olub. 1989-cu ilin iyununda Nişanov SSRİ Ali Sovetinin Millətlər Şurasının sədri təyin edilib. 1991-ci ilin sentyabrında SSRİ Prezidentinin müşaviri vəzifəsini tutub.