Xəbər - Samir Əli – Trend:
Sabirabad rayonu Minbaşı bələdiyyəsinin rüşvət almaqda təqsirləndirilən sabiq sədrinin barəsində olan cinayət işi yekunlaşıb.
AzerTimes-ın məlumatına görə, sabiq bələdiyyə sədri Qocayev Urufulla Yadulla oğlunun işi baxılması üçün Lənkəran Ağır Cinayətlər Məhkəməsinə göndərilib.
İşə hakim Müşviq Məmmədovun sədrliyi ilə baxılacaq. İş üzrə məhkəmənin hazırlıq iclası sentyabrın 23-nə təyin edilib.
Baş Prokurorluqdan verilən məlumata görə, Sabirabad rayonu Minbaşı bələdiyyəsinin sabiq sədri Qocayev Urufulla Yadulla oğlunun qanunsuz əməlləri ilə əlaqədar daxil olmuş vətəndaş müraciəti əsasında Baş prokuror yanında Korrupsiyaya qarşı Mübarizə Baş İdarəsi tərəfindən həyata keçirilmiş əməliyyat-axtarış tədbirləri nəticəsində sonuncu cinayət başında yaxalanaraq barəsində Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.
Aparılmış əməliyyat-istintaq tədbirləri ilə qeyd olunan vəzifədə işləyərkən Urufulla Qocayevin kəndin ərazisində yerləşən 60 hektar kənd təsərrüfatı təyinatlı torpaq sahəsinin 29 il müddətinə icarəyə verilməsi, 0,12 hektar torpaq sahəsinin satılmasının təmin edilməsi və həmin torpaq sahəsində tikinti işlərinin həyata keçirilməsinə ümumi himayədarlıq göstərilməsinə görə 12 min manat məbləğində pul vəsaitinin rüşvət qismində almasına əsaslı şübhələr müəyyən edilib.
İş üzrə toplanmış mötəbər sübutlar əsasında Urfulla Qocayev 03 iyun 2021-ci il tarixdə Cinayət Məcəlləsinin 311.3.2 (təkrar rüşvət alma) və 311.3.3 (külli miqdarda rüşvət alma) maddələri ilə şübhəli şəxs qismində tutulub.