Xəbər - Cani Babayeva – Trend:
“COVID-19-dan sonrakı dünya” mövzusunda VIII Qlobal Bakı Forumu kimi planetar miqyaslı mötəbər tədbirin keçirilməsi Azərbaycanın nüfuzunun göstəricisidir.
Bu barədə AzerTimes-a Rusiyanın nüfuzlu “Milli Müdafiə” jurnalının baş redaktoru, tanınmış hərbi ekspert İqor Korotçenko bildirib:
“Belə genişmiqyaslı forumun Bakıda keçirilməsi şəxsən məni təəccübləndirmir, çünki biz Azərbaycanın BMT-də pandemiyanın nəticələrini təhlil etmək, pandemiyanın fəsadlarının gətirdiyi çağırışlara cavab axtarmağa həsr olunmuş təşəbbüslərini xatırlayırıq”.
İ.Korotçenko vurğulayıb ki, görkəmli siyasətçilər, beynəlxalq ekspertlər “COVID-19-dan sonrakı dünya” VIII Qlobal Bakı Forumunda iştirak ediblər: “Bu, onun göstəricisidir ki, bu gün onlar təkcə Vaşinqtonda, Pekində, Moskvada, Berlində deyil, həm də Bakıda zamanın çağırışlarına cavab axtarırlar”.
Qeyd edək ki, 4-6 noyabr tarixində Bakıda Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “COVID-19-dan sonrakı dünya” mövzusunda VIII Qlobal Bakı Forumu keçirilib.
Sayca 8-ci olan Bakı Forumunda qlobal əhəmiyyət kəsb edən məsələlərin müzakirəsi məqsədilə dünyanın 40-dan çox ölkəsindən ali və yüksək səviyyəli nümayəndələr, sabiq dövlət və hökumət başçıları, beynəlxalq və qeyri-hökumət təşkilatlarının rəsmiləri, eləcə də digər nüfuzlu qonaqlar iştirak ediblər.