Əvvəllər Rişi Sunakın rəhbərlik etdiyi Böyük Britaniya Xəzinədarlığı “Vaqner”in rəhbəri Yevgeni Priqojinin ingilis jurnalisti Eliot Higginsi məhkəməyə vermək üçün sanksiyalardan yan keçməsinə icazə verib.
AzerTimes xəbər verir ki, bu barədə “OpenDemocracy” Rusiyanın ən böyük hüquq firmalarından birinin “sındırılmış” elektron məktublarına istinadən məlumat yayıb.
Qeyd olunur ki, Rişi Sunak tərəfindən idarə olunan Böyük Britaniya Xəzinədarlığı 2021-ci ildə oliqarxa sanksiyalardan yayınmağa və London məhkəmələrində jurnalistə qarşı aqressiv hüquqi kampaniya başlatmağa imkan verən xüsusi lisenziyalar verib. Higginsə qarşı Priqojinin böhtan iddiası “Bellingcat” nəşrinin “Vaqner”in kölgəli əməliyyatları haqqında yazılarından sonra yaranıb. Məhkəmə işi 2022-ci ilin martında Rusiya- Ukrayna müharibəsi başlayandan sonra dayandırılıb. Amma sanksiyaya məruz qalan rus oliqarxın hüquqi hücumu necə həyata keçirməsinin əsas təfərrüatı indiyədək sirr olaraq qalır.
Araşdırmaya görə, hökumət Britaniya hüquq firmasına iş üzərində işləmək üçün lisenziya verib. Sanksiyalar Priqojinin Londona gəlməsinin qarşısını alıb. Lakin Böyük Britaniya hökuməti onun britaniyalı vəkillərinə Sankt-Peterburqa biznes-klassda uçmaq icazəsi verib ki, onlar Priqojinlə üz-üzə görüşə bilsinlər və Higginsə qarşı hüquqi işlərini başa çatdırsınlar. Priqojin London vəkillərinə birbaşa Rusiyadan köçürmə yolu ilə ödəniş edib və bu, Britaniya bankının ilkin olaraq sanksiyalara görə vəsaiti saxlamasına səbəb olub.
Priqojinin işini varlı xarici müştərilərin maraqlarını təmsil edən Rocer Gersonun rəhbərlik etdiyi “Discreet Law” şirkəti öz üzərinə götürüb. Firma ətraflı hüquqi plan hazırlamaq üçün Priqojinin rus hüquqşünasları “Capital Legal Services” ilə işləyib.
“Discreet Law” şirkətinin vəkilləri Rusiyanın Ukraynaya müdaxiləsindən bir ay sonra, ötən ilin mart ayında işi davam etməkdən imtina edib, məhkəmə dayandırılıb. Jurnalist isə məhkəmə işi ilə bağlı 70 min funt-sterlinq xərc çəkməyə məcbur olub.