Rusiyanın Donetsk vilayətinin Pokrovsk rayonunda yaşayış binasına hücumu nəticəsində ölənlərin sayı 9-a çatıb.
AzerTimes xəbər verir ki, bu barədə Ukrayna Prezidenti Vladimir Zelenski məlumat verib.
“Doqquz nəfər həlak olub. Yaxınlarına başsağlığı verirəm. 82 nəfər yaralanıb. Hər kəsə lazımi yardım göstərilir”, – Zelenski bildirib.
Zelenski əlavə edib ki, hücum zamanı bir neçə raket zərbəsi endirilib. İkinci hücum artıq xilasetmə əməliyyatı başlayanda baş verib:
“Terrorçuların belə şüurlu qərarı ən çox ağrı, ən çox zərər verməkdir. Bunun üçün maksimum məsuliyyəti Rusiya daşıyacaq. Hadisələrin necə inkişaf etməsindən asılı olmayaraq, terrorçulara qarşı cəzalar olmalıdır”.
Qeyd edək ki, avqustun 7-də Rusiya Pokrovskiyə “İsgəndər” raketləri ilə zərbələr endirib.