NATO kontingentindən 700 əlavə hərbçi Kosovaya göndəriləcək.
AzerTimes xəbər verir ki, bu sözləri NATO Baş katibi Yens Stoltenberq deyib.
“Biz Balkan bölgəsi üçün operativ ehtiyatdan əlavə 700 nəfər göndərmək qərarına gəldik. Həmçinin, daha bir batalyon döyüş hazırlığı vəziyyətinə gətiriləcək. Lazım gələrsə, onlar da yerləşdiriləcək”, – o bildirib.
Stoltenberq NATO-nun KFOR kontingentinin təhlükəsizliyi təmin etmək üçün zəruri addımları atacağını vurğulayıb və Kosovada vəziyyəti gərginləşdirən tərəfləri zorakılığı dərhal dayandırmağa çağırıb.
Qeyd edək ki, iki gün öncə Kosovanın şimalında etiraz edən serblərlə təhlükəsizlik qüvvələri arasında toqquşmalar baş verib. Nəticədə xeyli sayda həm mülki, həm də NATO hərbçisi yaralanıb.