İlk növbədə qeyd olunmalıdır ki, cinayətin xüsusi amansızlıqla, o cümlədən əzab və ya işgəncə verilməklə törədilməsi ağırlaşdırıcı hal hesab olunur və cəza təyin edilərkən nəzərə alınır.
Bu sözləri AzerTimes-a açıqlamasında “Sirius” vəkil bürosunun hüquqşünası Seymur Nağıyev Sumqayıt şəhərində 1994-cü il təvəllüdlü tanınmış idmançı Mehman Xəlilovun məşq zamanı 7 yaşlı tələbəsi Fərid Bakarova qarşı təhlükəli fənd işlətməsi, daha sonra isə halsız vəziyyətdə olan uşağa zor tətbiq etməklə onun ölümünə səbəb olması barədə görüntüləri şərh edərkən deyib.
Onun sözlərinə görə, Cinayət Məcəlləsinin 113-cü maddəsi işgəncə ilə bağlıdır, lakin bu, hazırki hala şamil olunmur:
“Həmin əməl eyni zamanda CM-in 133.2.6-ci maddəsində göstərilən əmələ bənzəsə də, CM-in 126-ci maddəsində nəzərdə tutulan nəticələrə səbəb olduğu üçün Mehman Xəlilova qarşı 126.3-cü maddə ilə ittiham irəli sürülmüşdür.
Bu maddəylə isə o, 9 ildən 12 ilədək azadlıqdan məhrum edilə bilər”.