Krım körpüsü ilə hərəkət edən yük avtomobilinin içində güclü oksidləşdirici maddə olub, hidrogen peroksid və ya kalium permanganat ilə əlaqəli bir şey. Və bu oksidləşdiricilər qəribə üsul ilə kamuflyaj edilib. Yük avtomobilinə baxış keçirilsə belə, orada partlayıcı olmasını heç kim təyin edə bilməzdi. Biz artıq yeni nəsl texnologiyadan və partlayıcılardan danışırıq.
AzerTimes xəbər verir ki, bu fikirləri Rusiya mətbuatına açıqlamasında xüsusi xitmət orqanlarında çalışan mənbə bildirib.
“Dediyimiz elementlərin olduğu yerdə ciddi partlayışa böyük miqdarda partlayıcı maddə tələb olunmur. Güclü partlayış üçün kiçik “təşəbbüskar” kifayətdir – qığılcım. Yük avtomobili lazımi nöqtədə olan anda sürücünün mobil telefonu çalınır – sürücü cavab verir və partlayış baş verir. Sürücü kabinəsində baş verən xırda partlayış – “təşəbbüskar” zəncirvari reaksiya ilə oksidləşdirici agentin detonasiyasına səbəb olur və bu, partlayışın gücünü on dəfə artırır. Detonasiya bir neçə mərhələdə davam edir və güclü yangınla müşahidə olunaraq körpünün dağılmasına səbəb olur”, – o deyib.
Qeyd edək ki, bu gün Rusiyanın FTX-si xüsusi bəyanatla çıxış edib. Bildirilib ki, Krım körpüsündə terror aktının təşkilatçısı Ukrayna Müdafiə Nazirliyinin Baş Kəşfiyyat İdarəsinin rəhbəri Kirill Budanov, idarənin əməkdaşları və agentləri olub. Partlayıcı qurğu ümumi çəkisi 22.77 ton olan 22 altlıq üzərində polietilen plyonka ilə rulonlarda gizlədilib.
Avqustun əvvəlində yük Kiyevdəki Translogistic UA MMC ilə Bolqarıstanın Baltex Capital S.A. şirkəti arasında bağlanan müqaviləyə görə, Odessadan Bolqarıstanın Rusa limanına göndərilib.
Yük Bolqarıstandan Gürcüstanın Poti limanına, oradan isə Ermənistana göndərilib. Bu işdə Ukrayna vətəndaşları Syurkalo Mixail Vladimiroviç, Kovaçs Denis Oleqoviç, Solomko Roman İvanoviç, Gürcüstan vətəndaşı “Levan” ləqəbli Sandro İnosaridze adlı broker və Ermənistan vətəndaşı Artur Terçanyan və s. (ümumilikdə 8 nəfər) iştirak edib.
Sentyabrın 29-dan oktyabrın 3-dək İrəvanda “Transalyans” terminalında həmin “yük” Avrasiya İqtisadi İttifaqının qaydalarına əsasən gömrükdə rəsmiləşdirilib, sənədlər dəyişdirilib. Artıq onu göndərən “Qu ar ci Qrup” MMC (Ermənistan, Alaverdi şəhəri) olub.
Gürcüstanda qeydiyyatda olan DAF markalı yük avtomobili ilə yük oktyabrın 4-də Yuxarı Lars keçid məntəqəsində Rusiya-Gürcüstan sərhədindən keçib, iki gün sonra Armavirdəki topdansatış bazasına çatdırılıb.
Oktyabrın 7-də Ukrayna vətəndaşı R.Solomko, Vladimir Vasilyeviç Zlob və daha 5 Rusiya vətəndaşının köməkliyi ilə yükün sənədləri yenidən dəyişdirilib. Göndərən şirkət Ulyanovskdakı TEK-34 MMC, alıcı isə Krımda mövcud olmayan şirkət göstərilib.
Həmin gün palletlər Simferopola yola düşən Rusiya vətəndaşı, 1971-ci il təvəllüdlü Mahir Yusubovun yük maşınına yüklənib və 2022-ci il oktyabrın 8-də saat 6:03-də Krım körpüsündən keçərkən partlayış baş verib.
Xatırladaq ki, M.Yusubovun teraktda əli olmadığı artıq sübut edilib.