Mərkəzi Gömrük Hospitalının Mama-ginekologiya şöbəsinin
rəisi, mama-ginekoloq Təranə Bayramova “Həkim məsləhəti”
rubrikasında hamiləlikdə əhval-ruhiyyənin yüksəlməsinə dair
məsləhətlərini bölüşüb.
Hamiləlik müddəti bir qadın üçün ən diqqət tələb edən dövrlərdən
biridir. Səbirsizliklə körpəni qucağa alacağı günü gözləyirlər. Bu
dövrü daha da əyləncəli keçirmək üçün nə etmək olar? Əvvəlki
əyləncə vərdişlərinizdən nələri dəyişdirmək lazımdır? Hamiləlikdə,
eyni zamanda, əylənərək özünüzə və körpəyə lazım olan qayğını necə
göstərmək olar?
Hamilələrə məsləhətlər:
- Hamiləlik dövrü əslində əyləncəli bir zaman kəsiyidir,
mümkünsə, bu günləri hiss edərək yaşamağa çalışın. Gündəlik yazmağa
münasibətiniz necədir? Hamiləlik zamanı hər həftə bir foto
çəkdirməyi tövsiyə edərdim. Gələcəkdə doğulacaq körpənizlə
gündəlikdəki yazıları oxumaq, hamilə ikən çəkdirdiyiniz şəkillərə
baxmaq sonradan çox zövqverici olur. - Özünüzü əzizləyin. Hamiləlik yoqası ilə məşğul olun, masaj və
dəri qulluğu etdirin. Çəkinizə diqqət etmək şərtilə sevdiyiniz
qidaları qəbul edin. - Özünüz və gələcək körpəniz üçün alış verişə çıxın.
- Həyat yoldaşınız və ya yaxınınız ilə bərabər əlverişli hava
şəraitində 30-40 dəqiqəlik gəzintiyə çıxa bilərsiniz. - Əgər ev xanımısınızsa, hobbi kurslarına (yemək, aşçılıq, rəsm,
toxuma və s.) yazılın. - Həkiminiz uyğun görərsə, qısa müddətli səyahətə çıxa
bilərsiniz. Yaddan çıxarmayın ki, uşaq doğulduqdan sonra
yoldaşınıza qarşı diqqətiniz azalacaq, bu günlərinizi
dəyərləndirin. - Artıq çəkili görünmə kompleksi olmadan dənizə, hovuza gedin,
üzün. - Əgər həkiminiz yataq istirahəti uyğun görübsə, bu vəziyyətdən
istifadə edin. Kitab oxuyun, film izləyin. Qoyun, bir az da sizə
qulluq etsinlər. - Daha əvvəl doğuşu olan, ya da hamilə olan rəfiqələrinizlə tez
tez görüşün, duyğu və təcrübələrindən faydalanaraq söhbətlər
edin. - Qonaqlığa gedincə, spirtli içkidən istifadə etməyin, siqaretsiz
və sakit məkanlara üstünlük verin, ağır, yağlı və gecə vaxtı qida
qəbulundan imtina edin.