Fransa və İtaliyanı birləşdirən dəmir yolu tunelinin tikinti meydançasında baş verən qarşıdurmalarda təxminən on polis əməkdaşı və bir neçə nümayişçi yaralanıb.
AzerTimes xəbər verir ki, bu barədə CNN məlumat yayıb.
“Fransanın Lion şəhərini İtaliyanın Turini ilə birləşdirəcək 57 kilometrlik tunelin tikintisi layihəsinə etiraz edən 3000-dən çox insan üçün 2000-ə yaxın polis əməkdaşı yerindəcə səfərbər edilib.
Nümayişə “Uprisings of the Earth” adlı təşkilat çağırıb. Nümayiş zamanı yaranan şiddətli toqquşmalar Fransa və İtaliyanın 2017-ci ildə razılaşdığı və qismən AB-nin sponsorluq etdiyi tunel layihəsi ilə bağlı müzakirələri yenidən alovlandırıb.
Fransa hökuməti hesab edir ki, yeni tunel yüksəksürətli dəmir yolu ilə birlikdə Lion və Turin, həmçinin Paris və Milan arasında səyahət vaxtını əhəmiyyətli dərəcədə azalda bilər. Öz növbəsində layihənin əleyhdarları ətraf mühitə dəyən ziyandan narahatdırlar və deyirlər ki, mövcud qatar şəbəkələri daha yavaş olsa da, tələbatı ödəyə bilər”, – məlumatda deyilir.