ABŞ-ın Florida ştatının qubernatoru Ron Desantis ştatın 67 dairəsindən 15-də “Elza” tropik fırtınası səbəbindən fövqəladə vəziyyət rejimi elan edib.
AzerTimes-ın “TASS”a istinadən verdiyi məlumata görə, bu barədə qubernatorun saytında dərc edilən bəyanatda deyilir.
Məlumata əsasən, fövqəladə vəziyyət rejiminin tətbiq edilməsi yerli hakimiyyət orqanlarına bəzi əlavə vəsaitləri əldə etməyə və təbii fəlakətin nəticələrinin aradan qaldırılmasında daha çox mənbədən istifadə etməyə imkan verir. Bu, xüsusilə ABŞ Milli Qvardiyasının xilasetmə və ya bərpa işlərinə cəlb olunmasını mümkün edir.
“Elza” tropik fırtınası bu həftənin əvvəlində Atlantik okeanında formalaşıb. Gələn həftənin əvvəllərində fırtınanın Florida sahillərinə yaxınlaşması gözlənilir.