AB missiyası Cermuk və İcevanda yeni əməliyyat mərkəzləri açacaq.
AzerTimes xəbər verir ki, bunu AB-nin Ermənistandakı nümayəndəliyinin mətbuat xidmətinin rəhbəri Markus Ritter deyib.
“Missiya yaxın aylarda Cermuk, İcevan və Yeğeqnadzorda (Keşişkənd) üç əlavə əməliyyat mərkəzi açmağı və yaxın gələcəkdə tədricən tam hazır vəziyyətə gətirməyi planlaşdırır”, – o bildirib.
Onun sözlərinə görə, işə başlayandan ilk üç ay ərzində missiya Gorus, Cermuk və Göyçədəki Aşağı Qaranlıq (indi adını dəyişib Martuni ediblər – red.) mərkəzlərindən ümumilikdə 300-dən çox patrul xidməti həyata keçirib:
“Patrullar hər həftə 3800 km-dən çox məsafə qət edirlər. Məqsədimiz digər məsələlərlə yanaşı, sərhədyanı ərazilərdə təhlükəsizliyin sabitləşməsinə töhfə verməkdir. Vəziyyətin müəyyən qədər sabitləşməsinə töhfə verilib. Bununla belə, vəziyyət hələ də qeyri-sabitdir”.