Avropa Şurasının Baş katibi Mariya Buriçin Bakıya gəlməsini alqışlayıram. AŞPA ilə münasibətlərdə gərginlik var. İnanıram ki, Buriçin Bakı səfəri Azərbaycanla AŞPA arasındakı gərginliyin aradan qaldırılmasına, hətta bu qurumdakı üzvlüyümüzün bərpa olmasına gətirib çıxara bilər.
Bu sözləri AzerTimes-a açıqlamasında professor Qabil Hüseynli deyib.
“Brüseldə ABŞ, İrəvan və AB arasında Ermənistanın təhlükəsizliyi məsələləri müzakirə edilib. Bu görüş bölgəyə yanaşmanın çox kobud və yaramaz forması idi. Bölgənin ən qüdrətli dövlətini görməzdən gələrək, Ermənistan üçün belə bir tədbirin keçirilməsi düzgün deyil. Sözügedən görüşdən sonra AŞ-ın baş katibinin bölgəyə gəlməsini müsbət qiymətləndirirəm. Bu səfər Bakı-AŞPA münasibətlərinin yumşalmasına və Azərbaycanla Ermənistan arasında sülh müqaviləsinin imzalanmasına töhfə verə bilər”, – o bildirib.
Qeyd edək ki, Buriç hazırda İrəvanda səfərdədir, daha sonra Tiflis və Bakıya gələcəyi gözlənilir.