“Nərimanov” metrosu yaxınlığında yerləşən “Mado” restoranının yanında avtobus zolağı bağlanılıb. Bu isə yolda həm insanların, həm də nəqliyyat vasitələrinin hərəkətinə mane törədib.
Məsələ ilə bağlı AzerTimes-a açıqlama verən Bakı Nəqliyyat Agentliyinin mətbuat xidmətinin rəhbəri Mais Ağayev artıq sözügedən problemin həll edildiyini bildirib:
“Əhməd Rəcəbli və Təbriz küçələrinin kəsişməsində avtobus zolağının xüsusi maneələr vasitəsilə bağlanması qəbuledilməz haldır. Bu cür davranışlar yol hərəkəti qaydalarının pozulması ilə yanaşı, həm də həmin ərazidən keçən müntəzəm marşrut xətlərindən istifadə edən sərnişinlərə qarşı hörmətsizlikdir. Həmçinin, bu zolağın zəbt olunması avtobusların da müəyyən olunmuş qrafik üzrə hərəkətini ləngidir. Nəticədə gün ərzində minlərlə sərnişin lüzumsuz yerə vaxt itirərək əsəb və stres yaşayır. Agentliyin müdaxiləsi nəticəsində artıq zolaq üzərində olan maneələr tamamilə aradan qaldırılıb”.