Xəbər - Ləman Zeynalova, tərcümə Orxan Nəbiyev – Trend:
“Cənub Qaz Dəhlizi” strateji və irimiqyaslı layihəsinin uğurla reallaşdırılması son illərdə qaz tədarükünün şaxələndirilməsi sahəsində əldə olunan nailiyyətlərin ayrılmaz hissəsidir.
AzerTimes-ın məlumatına görə, bunu Bolqarıstanın energetika naziri Temenujka Petkova “Cənub Qaz Dəhlizi” Məşvərət Şurasının 7-ci iclasında deyib.
Nazir bildirib ki, bu layihə Bolqarıstanın, Cənub-Şərqi Avropanın və ümumilikdə Avropa İttifaqının enerji təhlükəsizliyini möhkəmləndirəcək.
O qeyd edib ki, Bolqarıstan Yunanıstan-Bolqarıstan interkonnektoru (IGB) vasitəsilə “Cənub Qaz Dəhlizi”nin ayrılmaz hissəsini təşkil edir:
“Layihə, həmçinin cənubdan şimala “Şaquli” qaz dəhlizinin tikintisi üçün Yunanıstan, Bolqarıstan, Rumıniya və Macarıstanın birgə təşəbbüslərinin reallaşdırılmasında vacib rol oynayır. COVID-19 pandemiyası ilə əlaqədar ləngimələrə baxmayaraq, layihənin bu ilin ikinci yarısında işə salınması gözlənilir”.