Bakıda TEKNOFEST Aerokosmik və Texnologiya Festivalının bağlanış
mərasimi keçirilib.
Trend xəbər verir ki, festivalın bağlanış mərasimində
Azərbaycanın rəqəmsal inkişaf və nəqliyyat naziri Rəşad Nəbiyev,
Türkiyənin “Baykar Makina” şirkətinin texniki direktoru Səlçuk
Bayraktar, eləcə də Azərbaycanın və Türkiyənin bir sıra digər
nazirləri iştirak ediblər.
R.Nəbiyev vurğulayıb ki, bu dörd gün ərzində Azərbaycan gəncləri
festivaldan çox şey öyrəniblər.
Öz növbəsində S.Bayraktar növbəti” TEKNOFEST”in Bakıda və
ölkənin digər şəhərlərində yenidən keçirilə biləcəyini
bildirib.
R.Nəbiyev və S.Bayraktar tədbirdən məmnun olduqlarını
bildiriblər, həmçinin “TEKNOFEST”in Azərbaycanda keçirilməsinə
imkan yaratdığına görə Azərbaycan Prezidenti İlham Əliyevə və
Türkiyə Prezidenti Rəcəb Tayyib Ərdoğana təşəkkür ediblər.
Qeyd edək ki, dörd gün ərzində, mayın 26-29-da festivalda
Türkiyə və Azərbaycan şirkətlərinin beynəlxalq sərgiləri, əyləncə
proqramları, aviaşoular və bir sıra digər tədbirlər təşkil
olunub.
Bakıda “Teknofest” festivalı Türkiyənin Sənaye və
Texnologiyalar Nazirliyi, Türkiye Teknoloji Takımı Vakfının (T3
Vakfı) təşkilatçılığı, Azərbaycan Rəqəmsal İnkişaf və Nəqliyyat
Nazirliyinin tərəfdaşlığı ilə keçirilib. Eyni zamanda Bakıda
“Teknofest” in “prodakşn” ofisi fəaliyyət göstərir. Ofisin tam
heyəti azərbaycanlı mütəxəssislərdən ibarətdir.
“Teknofest” tədbiri Türkiyə Respublikası Sənaye və
Texnologiya Nazirliyinin və Selçuk Bayraktarın rəhbərlik etdiyi
Türkiye Teknoloji Takımı Vakfının (T3 Vakfı) birgə təşkilatçılığı
və qardaş ölkənin 60-dan çox dövlət qurumu, ali məktəbi və özəl
şirkətinin tərəfdaşlığı ilə 2018-ci ildən etibarən hər il
keçirilir.
Məqsəd Türkiyədə aviasiya, kosmik sənaye, rəqəmsal iqtisadiyyat
kimi sahələrin gənclər arasında təbliği, bu sahələrdə sahibkarlığın
təşviq edilməsi, festival çərçivəsində təşkil olunan yarışlar
vasitəsilə gənc mühəndislərin bilik və bacarıqlarının üzə
çıxarılması, eləcə də milli texnologiyaların geniş ictimaiyyətə
təqdim olunmasıdır.
Trend İnformasiya Agentliyi, Day.Az, Milli.Az, Azernews, Eastweststream, Today.az və Turkic.World “Teknofest 2022” aerokosmik və
texnologiya festivalının rəsmi media tərəfdaşlarıdır.