AŞPA-nın Azərbaycan nümayəndə heyətinin etimadnaməsini təsdiqləməməsi və qurumdan Azərbaycanı bir il müddətinə uzaqlaşdırması Ermənistan hakimiyyətində sevinclə qarşılanıb.
AzerTimes xəbər verir ki, bu barədə erməni müxalif mediası məlumat yayıb.
Bildirilir ki, qərarın qəbulunda xüsusilə Ermənistan nümayəndə heyəti və onun rəhbəri Ruben Rubinyan aktivlik göstərib.
“Bu qərar hakimiyyət dairələrində böyük sevincə səbəb olub, hakimiyyətin güclü diplomatik qələbəsi kimi təqdim olunur, çünki onlar Azərbaycana qarşı cəza tədbirləri həyata keçirmək üçün çalışdıqlarını təsdiqləyiblər”, – məlumatda bildirilib.
Müxalif “Şərəfim var” fraksiyasının rəhbəri Ayk Mamicanyan “Hakimiyyətin böyük diplomatik qələbəsi” haqqında danışmaq istəməyib. Buna baxmayaraq, bəzi müxalif deputatlar AŞPA-nın qərarının heç bir ciddi nəticəsi olmayacağını, Əliyevə hər hansı təsir etməyəcəyini bildirərək, “Mülki müqavilə” üzvlərini “göyün yeddinci qatından enməyə” çağırıblar.
Xüsusi tapşırıqlar üzrə səfir Edmon Marukyan isə deyib ki, AŞPA-da verilən qərar müəyyən mənada gecikmiş hesab oluna bilər:
“Çünki Azərbaycanda baş verənlərə, Qarabağda həyata keçirilənlərə görə bu cür qərar xeyli əvvəl qəbul olunmalı idi. Amma, necə deyərlər, heç vaxt olmamasından gec olması yaxşıdır. Bu mənada ümid edirəm ki, Azərbaycanda bu qərardan nəticə çıxaracaqlar, çünki Qarabağda baş verənlər 120 min insanın etnik təmizlənməsi, insan haqlarının kütləvi şəkildə pozulması və haqqında danışdığımız bütün pozuntulardan bəhs edir. Ümid edək ki, Azərbaycan belə bir qərardan nəticə çıxaracaq”.
O qərarın niyə məhz indi qəbul edilməsinə gəlincə, Manukyan buna konkret cavab verməyib və dolayısı ilə bu qərarın Qərbin öz marağında olmasını təsdiqləyib:
“Bir çox amillər üst-üstə düşə və ya üst-üstə düşməyə də bilər, hər halda, bəli, sürpriz var: niyə əvvəllər yox, indi? Çünki Azərbaycan Avropanın fundamental sənədlərinə əməl etməyib, Avropa Məhkəməsinin bir çox qərarını yerinə yetirməyib”.
Səfir Ağacanyanın isə deyib ki, bu qərara səbəb Azərbaycan “Qərbin nəzarətindən çıxması” və Rusiya və İranla sıx əməkdaşlıq etməsidir (Halbuki İranla sıx əməkdaşlıq edən Ermənistandır – red.):
“Qərb Qarabağın əhalisinin məcburi çıxarılması faktına göz yummağa çalışdı, ümid edirdi ki, bu, sülh müqaviləsinin imzalanmasını asanlaşdıracaq və bununla da Azərbaycan Qərb qarşısında götürdüyü öhdəliyi yerinə yetirəcək. Qərb İrana qarşı əməliyyatlar aparır, lakin Azərbaycanın buna həvəsinin olmadığı açıq-aydın görünür. Bu baxımdan təsadüfi deyil ki, Əliyev Qarabağı qəbul etdikdən sonra Rusiya sülhməramlılarını Qarabağda saxlayaraq, Rusiya-İran qanadına kəskin dönüş etdi, halbuki mühasirə zamanı mütəmadi olaraq sülhməramlıların Qarabağı tərk etməsi məsələsini qaldırırdı. Digər tərəfdən Azərbaycan İranla Xəzərdə hərbi təlimlər keçirdi və İranda səfirliyin açılması və səfirin geri qaytarılması məsələsini müzakirə etməyə başladı. Təbiidir ki, Qərb onilliklər ərzində maliyyə, hərbi və digər vasitələrə böyük sərmayələr yatırdığı üçün buna uzun müddət dözə bilməz, ona görə də Qərb müxtəlif parlamentlərdə qətnamələr şəklində sarı vərəqə göstərmək alətlərindən istifadə etmək qərarına gəlib. Bura Fransa Senatının qəbul etdiyi qətnamə də daxildir”.
Buna baxmayaraq, o, Azərbaycanın Ermənistanla bağlı mövqeyində heç bir dəyişiklik olmayacağına əmindir:
“Erməni tərəfinə təzyiqlər davam edəcək, ritorika dəyişməyəcək və bu işdə Qərbin adından çıxış edən İngiltərə, əksinə, hakimiyyətimizi güzəştə getməyə inandırmağa çalışacaq”.
Ağacanyanın sözlərinə görə, Qərb ümid edir ki, sülh sazişi nə qədər tez bağlansa, Rusiyanı regiondan sıxışdırıb çıxarmaq bir o qədər sürətlənəcək:
“Qərb sülh sazişindən sonra Rusiya hərbi bazasının Ermənistandan çıxarılacağını gözləyir. Ağır hərbi texnikanın İran sərhədinə daşına biləcəyi dəhliz (Zəngəzur dəhlizi – red.) Azərbaycanın İrana qarşı hərəkətləri qədər Qərb üçün önəmlidir. Qəzza və Ukraynada baş verən proseslər nəzərə alındıqda bu vəziyyət kritikləşir, yəni Azərbaycanın mövqeyi Qərbin dünyada vəziyyətini çətinləşdirir və onun geosiyasi mövqelərinə daha böyük zərbə vurur”.
Ermənistanın AŞPA-dakı nümayəndə heyətinin keçmiş üzvü Naira Zöhrabyan isə bu qətnamə ilə bağlı sevinci bölüşmür və bunu diplomatik qələbə hesab etmir:
“Əslində, Azərbaycanda fevralda keçiriləcək prezident seçkilərini müşahidə etmək üçün AŞPA müşahidəçilərinin dəvət edilməməsinin qətnaməyə salınması AŞPA-nın səhvidir. Həqiqətən, nə baş verib ki? Qərarın əsaslandırılmasını oxuyanda klassikanı xatırlayırıq: Doğrudanmı? Qarabağ blokadasının həyəcanlı təsvirini oxudunuz… İndi bizim nümayəndə heyətimizin üzvlərindən kiminsə sualı var idimi ki, o aylar ərzində niyə azərbaycanlı deputatların ağzını bağlamadınız, onları səsvermə hüququndan məhrum etmədiniz, niyə indi etdiniz?”
Zöhrabyan bildirib ki, bu sənədlərin heç bir təsiri yoxdur.