Xəbər - Fərid Zöhrabov -Trend:
Azərbaycan Gimnastika Federasiyasının nümayəndələri (AGF) Bakının Binə qəsəbəsində yerləşən “Ümid yeri” Uşaq Sığınacağına baş çəkiblər.
Trend xəbər verir ki, görüşdə AGF-ın əməkdaşları ilə birlikdə bədii gimnastika üzrə yığma komandanın üzvləri Zöhrə Ağamirova və Arzu Cəlilova da iştirak ediblər.
Onlar uşaq sığınacağının balaca sakinləri ilə xoş anlar keçiriblər. Federasiya nümayəndələri və gimnastlar qarşıdan gələn Yeni il və Dünya Azərbaycanlılarının Həmrəyliyi günü münasibətilə uşaqları təbrik edərək onlara xoşbəxt həyat arzulayıblar.
Gimnastlarımız balacalara yeni il hədiyyələri təqdim edib, onlarla xatirə şəkilləri çəkdiriblər.
Tədbir Covid-19 pandemiyası ilə bağlı qaydalar nəzərə alınaraq həyata keçirilib.