İki gün öncə ADA Universitetindəki konfrans zamanı Prezident Əliyevin qeyd etdiyi kimi, Azərbaycan və Ermənistan arasında sülh danışıqlarında indi müsbət meyil daha aydın görünür.
Bu sözləri AzerTimes-a sərhəddə başlayan delimitasiya və demarkasiya prosesi fəaliyyəti haqqında açıqlamasında Ceymstaun Fondunun idarə heyətinin üzvü, ABŞ-ın Azərbaycandakı sabiq səfiri, ATƏT-in Minsk qrupunun keçmiş həmsədri Metyu Brayza deyib.
“Cənab İlham Əliyev bu ilin sonuna qədər yekun sülh sazişinin olacağına ümid etdiyini və Paşinyanın Qazax rayonunun dörd kəndini Azərbaycana qaytaracağı barədə bəyanatını rəsmi İrəvanın xoş niyyətinin əlaməti kimi qəbul etdiyini bildirdi. Artıq kəndlərin qaytarılması və delimitasiya prosesi başlayıb. Bununla belə sərhədin delimitasiya və demarkasiyası, eyni zamanda sərhəd məsələləri ilə bağlı sazişin bağlanması bir müddət çəkəcək. Çünki sözügedən proses bəzi mürəkkəb texniki məsələlərin həllini tələb edir. Bununla yanaşı, hadisələrin gedişatına təsir edə biləcək müəyyən siyasi məsələlər də diqqətdən kənarda qalmamalıdır. Əsas vacib məqam isə ilk addımın atılması və tərəflərin sonadək Azərbaycan ilə Ermənistanı sülhə aparacaq siyasi iradəyə sahib olmasıdır”, – diplomat vurğulayıb.