Xəbər - Elçin Mehdiyev – Trend:
2022-ci ilin dövlət büdcəsi riskləri olmayan bir büdcədir. Son illər büdcə stabilləşib və tarazlı hala gəlib.
AzerTimes-ın məlumatına görə, bunu Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları, Beynəlxalq münasibətlər və parlamentlərarası əlaqələr komitələrinin və İntizam komissiyasının birgə iclasında büdcəmüzakirələri zamanı deyib.
Z.Əsgərov bildirib ki, büdcə müzakirəsi müharibədən sonrakı bir dövrdə aparılsa da yenə də büdcə sosial yönümlüdür:
“Müharibədən sonra büdcəmizin tarazlı olması və ölkədə iqtisadi artımın qeydə alınması çox ciddi məsələdir. Müharibə bizə böyük vəsait hesabına başa gəlib, amma bununla belə Azərbaycanın bu cür büdcəsinin olması çox müsbət haldır. Büdcədə təhlükəsizlik məsələləri üçün kifayət qədər vəsait ayrılıb. Təhlükəsizlik orqanlarının fəaliyyəti həmişə yüksək olmalıdır, çünki bizim Ermənistan kimi işğalçı qonşumuz var”, – deyə Z.Əsgərov bildirib.
Qeyd edək ki, 2022-ci ildə Azərbaycan dövlət büdcəsinin gəlirləri, rəsmi proqnozlara əsasən, 2021-ci illə müqayisədə 5,4 faiz artaraq 26,82 milyard manat təşkil edəcək.
Dövlət büdcəsinin xərcləri isə gələn il 29,89 milyard manata bərabər olacaq. Bu, 2021-ci illə müqayisədə 4,7 faiz çoxdur.