Xəbər - Samir Əli – Trend:
Paytaxt ərazisində davam edən küləkli hava şəraiti ilə əlaqədar olaraq Bakı Şəhər Dövlət Yol Polisi İdarəsi sürücülərə xəbərdarlıq edib.
Bu barədə AzerTimes-a İdarənin baş inspektoru, polis mayoru Araz Əsgərli məlumat verib.
O bildirib ki, kəskin hava şəraiti ilə əlaqədar olaraq sürücülər nəqliyyat vasitələrini təhlükəli ərazilərdə park etməsinlər.
“Sürücülər yollarda diqqəti artırsınlar. Moped və motosiklet tipli nəqliyyat vasitələrindən, eləcə də yük maşınlarından istifadə edən şəxslər hərəkətlərini məhdudlaşdırsınlar. Sadalanan nəqliyyat vasitələri mövcud hava şəraiti üçün olduqca əlverişsizdir və təhlükəlidir. Sürücülər, piyadalar və digər hərəkət iştirakçıları küləkli hava şəraitini nəzərə alaraq, çoxmərtəbəli binaların, ağacların yanından hərəkət edərkən diqqətli olsunlar. Ehtiyac olmadığı təqdirdə hərəkətlərini məhdudlaşdırsınlar” – deyə, mayor qeyd edib.