YAP-ın yaranması müasir Azərbaycan tarixinin vacib səhifələrindən biridir

29 il əvvəl “91-lər”in Ulu Öndər Heydər Əliyevə müraciəti müasir tariximizdə xüsusi önəm kəsb edir. Bu, müstəqilliyini yenidən əldə edən ölkəmizin düşdüyü ağır vəziyyətdən çıxmasına şans yaradan əlamətdar hadisədir. Ölkənin ciddi sınaqlara məruz qaldığı bir dövrdə böyük hədəfləri məqsəd qoyan partiyanın yaradılması və ölkəmizi sevən insanların Azərbaycan xalqı qarşısında böyük xidmətləri olan Heydər Əliyev şəxsiyyəti ətrafında birləşməsi bugünkü Azərbaycanın inkişafında, güclənməsində müstəsna rol oynamaqla tarixə qızıl hərflərlə yazılıb. YAP-ın yaranması müasir Azərbaycan tarixinin vacib səhifələrindən biridir.

Azərbaycan xalqının ümummilli lideri Heydər Əliyevin 1991-ci il sentyabrın 3-də Naxçıvan Muxtar Respublikası Ali Məclisinin sədri seçilməsi, 1992-ci il noyabrın 20-də Yeni Azərbaycan Partiyası təsis olunarkan sədr seçilməsi, 1993-cü il iyunun 15-də Azərbaycan Respublikası Ali Sovetinin sədri seçilməsi və nəhayət 1993-cu il oktyabrın 3-də xalqımızın böyük dəstəyini qazanaraq Ölkə Prezidenti seçilməsi kimi hadisələrin hər biri Azərbaycan xalqının müdrikliyinin və Ulu Öndərə olan inamının göstəricidir. Xalqımız yaxşı bilirdi ki, ölkənin gələcəyi yalnız Ulu Öndərin rəhbərliyi ilə uğurlu olacaq. Çünki, SSRİ dövründə də xalqımız qarşısında misilsiz xidmətləri olan böyük siyasətçi daim vətənin, millətin mənafeyini üstün tutub.

Ulu Öndər Heydər Əliyevin çoxillik fəaliyyəti siyasi məktəbə çevrilib. Heydər Əliyev Məktəbinin ən parlaq nümunəsi isə onun siyasi varisi İlham Əliyevdir. Cənab Prezident sözügedən siyasi kursu daha da inkişaf etdirərək xalqımızın əmin-amanlığı üçün böyük işlər görüb və onun bu missiyası uğurla davam etməkdədir. “İnanıram ki, mənim axıra çatdıra bilmədiyim taleyüklü məsələləri, planları, işləri İlham Əliyev başa çatdıra biləcək”, – deyə qeyd etməklə dahi siyasətçi Azərbaycan xalqına gələcək günlərin anonsunu vermişdir. Zaman keçdikcə bu fikrin reallığa çevrilməsinin şahidi olduq. Yeni Azərbaycan Partiyası cənab Prezident İlham Əliyevin rəhbərliyi müddətində də xalqın inamını doğrultmuş, onların sevgisini qazanmışdır. 2020-ci ildə 44 günlük Vətən müharibəsindəki qələbə isə bütün dünyaya Müzəffər Ali Baş Komandanın rəhbərliyi ilə inkişaf etmiş Azərbaycanın gücünü göstərdi.

Bir neçə siyasi mərhələni müsbət nəticələrlə yekunlaşdıran Yeni Azərbaycan Partiyası bu gün də daha böyük hədəflərlə öz fəaliyyətini uğurla həyata keçirir. Tarix Azərbaycan xalqının ümummilli lideri Heydər Əliyevin dediyi kimi Yeni Azərbaycan Partiyasının dünənin, bu günün və gələcəyin partiyası olmasını sübut etdi.
Fürsətdən istifadə edib bütün siyasi həmfikirlərimi Yeni Azərbaycan Partiyasının yaradılmasının 29-cu ildönümü münasibətilə təbrik edir, dövlətimiz və xalqımız üçün görülən işlərdə doğma partiyamıza uğurlar arzulayıram.

Şahin İsmayılov,
Milli Məclisin deputatı, YAP İdarə heyətinin üzvü

Teqlər: