Urmiya gölünün qurumasına etirazların artmasına görə azərbaycanlı fəallar İran rejiminin təhlükəsizlik qüvvələri tərəfindən təhdid olunub. Sosial şəbəkələrdə başlayan kampaniyadan ehtiyat edən rejim milli fəalları ETTELAAT idarəsinə çağıraraq, onları həbs edəcəkləri ilə bağlı hədələyiblər.
Bu sözləri AzerTimes-a Güney Azərbaycan Cümhuriyyət Partiyasının sədri Araz Ataxan deyib.
Onun sözlərinə görə, təhdid olunanların əksəriyyəti tanınmış milli fəallardır:
“Urmiya və Təbrizdə yaşayan fəallara evdən çıxmamaqla bağlı göstəriş veriblər. Bəzilərini idarəyə çağırıblar, bəzilərinə də telefonla zəng edərək hədələyiblər. Əsas tələbləri isə bu olub ki, milləti Urmu gölünün quruması ilə bağlı çağırışlardan çəkindirsinlər. Əks halda nəinki milli fəalları, hətta onların ailə üzvlərini də həbs edəcəklərini deyiblər”.