“Unibank” KB ASC 2021-ci ilin 1-ci rübünün maliyyə nəticələrini açıqlayıb. Bank rübü əksər sahələrdə müsbət göstəricilərlə başa vurub. Bu ilin 1-ci rübündə “Unibank”ın əldə etdiyi rüblük gəlir 2020-ci ilin ilk rübü ilə müqayisədə 16% artaraq 33 milyon manat olub. 31 mart 2021-ci il tarixə Bankın əldə etdiyi mənfəət isə (prudensial hesabat üzrə) 0,6 milyon manatdır. Bankın kapitalı da artaraq 98 milyon manata çatıb.
Bankın dinamik inkişafı əsas maliyyə göstəricilərinin artımında da özünü göstərib.Maliyyə nəticələrinə əsasən, 1-ci rüb ərzində “Unibank”ın aktivlərinın həcmində 3 % artım qeydə alınıb. Bununla da hesabat dövrünə bankın cəmi aktivləri 839 milyon manat təşkil edib. İlin əvvəlindən hesabat dövrünün sonunadək bankın məcmu kapitalının həcmində 2 % artım olub. Hesabat dövrünün sonuna bankın məcmu kapitalı 84 milyon manata çatıb.
Birinci rübün nəticələrinə görə, “Unibank”ın cəmi əməliyyat gəlirləri 19 milyon manat olub. Ötən ilin uyğun dövrü ilə müqayisədə 2021-ci ilin 1-ci rübündə “Unibank”ın faiz gəlirləri 14% artaraq, 26 milyon manat təşkil edib.
Bu ilin əvvəlindən etibarən Bank ölkə iqtisadiyyatının maliyyə vəsaiti ilə təminatında aktiv iştirakını davam etdirib. Hesabat dövründə Bankın kredit portfeli böyüyüb. Təkcə birinci rüb ərzində “Unibank”ın ümumi kredit portfelinin həcmi 46 milyon manata yaxın- 8% artıb. İstər pərakəndə, istər biznes kreditlərinin ayrılmasında artım qeydə alınıb.
Hər zaman olduğu kimi bu il də biznesin kreditləşməsi Unibank üçün prioritetlər sırasında olub. Ötən dövrdə xüsusən biznesin kreditləşməsinə diqqət artırılıb. O cümlədən real sektora, kiçik, orta sahibkarlığa verilən kreditlərin həcmi bu ilin əvvəlindən 10 % artıb. İlin əvvəlindən hesabat dövrünədək biznes sektoruna ayrılmış kreditlərin məbləği 46 milyon manat təşkil edib. Sahibkarlığın İnkişafı Fondu ilə əməkdaşlıq çərçivəsində bank bu ilin birinci rübündə də pandemiyadan zərər çəkmiş sahibkarlara dövlət zəmanətli, güzəştli kreditlərin ayrılmasını davam etdirib. “Unibank”ın Aqrar Kredit və İnkişaf Agentliyi ilə əməkdaşlığı çərçivəsində rüb ərzində 466 min manatlıq kənd təsərrüfatı təyinatlı güzəştli mikrokreditlər verilib.
“Unibank”ın depozit portfeli də rüb ərzində böyüyüb. Müddətli depozitlər ilin əvvəlindən 15,5 % artaraq 31 mart 2021-ci il tarixinə 386 milyon manat təşkil edib. Ölkədə nağdsız ödənişlərin və elektron ticarətin inkişafına daim dəstək verən Unibank, bu ilin ilk rübündə də bu sahəyə öz töhfəsini verib. Rüb ərzində dövriyyədə olan plastik kartların sayı nəzərəçarpacaq dərəcədə artıb. Ötən ilin eyni dövrü ilə müqayisədə debet kartlar 26% artaraq 481 minə, kredit kartların sayı isə 35% artaraq 117 minə çatıb.
Ölkə əhalisinə məsafədən bank xidmətinin göstərilməsini daha da zəruri edən pandemiya dövründə “Unibank”ın uBank tətbiqinin istifadəçilərinin sayı da artmaqdadır. Təkcə bu ilin əvvəlindən uBank-da qeydiyyatdan keçənlərin sayı 12,3 % artıb. Ötən ilin eyni dövrü ilə müqayisədə bu ilin ilk rübündə mobil tətbiq vasitəsilə aparılan kartla əməliyyat dövriyyəsi 37.5%, say olaraq isə 36% artıb.
Unibank KB ASC 1992-ci ildən fəaliyyət göstərir. Bankın paytaxtda və regionlarda geniş xidmət şəbəkəsi mövcuddur. 29 ilə yaxın mövcudluğu dövründə uğurlu kommersiya fəaliyyəti və sosial layihələrdə iştirakına görə beynəlxalq və yerli təşkilatlar tərəfindən çoxsaylı mükafatlara layiq görülüb.