“Azerspace-1” peyki üzərindən Türkiyənin bir neçə televiziya
kanalı yayıma başlayıb.
“Azərkosmos”dan AzerTimes-a
verilən məlumata görə, bu ilin mart ayından etibarən Türkiyənin
baxımlı televiziya kanallarından olan “TMB TV”, “Akıllı TV”, “Nurs
TV” və “EuroTrio TV” “Azerspace-1” telekommunikasiya peyki
üzərindən yayımlanır.
“TMB TV” kanalında əsasən türkdilli dövlətlərin musiqi və
mədəniyyətini əks etdirən proqramlar nümayiş olunur. “Akıllı TV” və
“Nurs TV” televiziyalarında daha çox əyləncəli verilişlər təqdim
edilir. “Azerspace-1” peykinin Avropa yayım şüasında yayımlanan
“EuroTrio TV” kanalının gündəlik məzmununu isə Türkiyənin, o
cümlədən beynəlxalq şirkətlərin ingilisdilli proqramları təşkil
edir.
Kanalların yayım tezlikləri aşağıdakı kimidir:
“TMB TV”, “Akıllı TV” və “Nurs TV” kanallarının yayım tezliyi:
11024/H/16500
“EuroTrio TV” kanalının yayım tezliyi: 11095/H/30000
Cənubi Qafqazda ilk və yeganə peyk operatoru olan Azərkosmos
telekommunikasiya və coğrafi kəşfiyyat sahələri üçün yüksək
keyfiyyətli peyk xidmətləri təqdim edir. 2013-cü ilin fevral ayında
orbitə buraxılan və Azərkosmos tərəfindən idarə edilən
“Azerspace-1” peyki 46° şərq uzunluğu orbital mövqeyində yerləşir
və Avropa, Afrika, Yaxın Şərq, Qafqaz və Mərkəzi Asiya regionlarını
əhatə edir.