Azərbaycanın öz gündəmi, bizim də nağıllarımız var. Onların gündəliyi çox konkretdir. Paşinyan isə çıxışları ilə nağıllar toplusu yaradır: “dinc region”, “dünyanın kəsişməsi”. Nikol sadəcə olaraq belə şəkilləri və nağılları sevir.
AzerTimes xəbər verir ki, bunu erməni politoloq Suren Surenyants deyib.
“Bu vəziyyətdə ən real həlli başa düşmək üçün əvvəlcə platformanı müzakirə etməliyik. Ən real platforma regional konteksti nəzərə alan platformadır. Yəni bu münaqişə regional kontekstdə həll olunmalıdır. Brüssel platforması özü ölü platformadır. Və təbiidir ki, Azərbaycan bu məsələnin regionallaşmasına doğru gedir, lakin Ermənistan hökuməti buna inadla məhəl qoymur. Rusiya və Türkiyə bütövlükdə Ermənistanın suverenliyinin və ərazi bütövlüyünün real təminatçısı, eləcə də Ermənistan-Azərbaycan münaqişəsinin həllinin qarantıdır. Çünki bu iki dövlət bizə problem yarada bilər və biz onlarla söhbət etməklə problemləri aradan qaldıra bilərik. Qalanları nağıllardır.
Vektorun dəyişdirilməsinə gəldikdə: Paşinyan müsahibə verərkən istiqamətini dəyişmədi, Strasburqda avropalıların nəvaziş və sığallarına arxalanaraq bir neçə dəfə Rusiyanın üstünə getdi. Bu o deməkdir ki, biz xaotik təfəkkürlü və sabit siyasi xəttin olmadığı bir liderin girovuyuq və bu, Ermənistan üçün çox ağır nəticələrə gətirib çıxara bilər. Rusiya ən yaxşı müttəfiq deyil, amma dəhşətli düşmənə çevrilə bilər, o qədər dəhşətlidir ki, dövlətçiliyimizin belini qıra bilər”, – o bildirib.