Rusiyalı politoloq Yevgeni Mixaylovun AzerTimes-a müsahibəsi:
– Trampın ABŞ prezident seçkilərində qalib gəldiyi artıq şübhəsizdir. O, dünyada müharibələri bitirməyi bacaracaqmı?
– Tramp da, Harris də çox da yaxşı insanlar deyil. Amma Tramp daha adekvat görünür və pulu saymağı bilir. O, çoxdan bəyan edib ki, hakimiyyətdə olsaydı, müharibələr, heç olmasa, hazırda gedənlər olmazdı. Və müqavilə şərtləri ilə daha ciddi işləyəcəkdi. Onun hansı kursu keçəcəyini bilmirəm. Möcüzə gözləməməlisən.
– Trampın qələbəsi Rusiya ilə münasibətlərə və Ukraynadakı hadisələrə necə təsir edəcək?
– Trampın qələbəsinin Rusiya ilə münasibətlərə necə təsir edəcəyini bilmirəm, amma Ukraynaya böyük miqdarda vəd edilən pullar çatdırılmayacaq, bu, dəqiqdir. Buna əminəm. Tramp dəfələrlə Ukraynada müharibəyə son qoyacağını bəyan edib. Rusiya öz işinə baxmalıdır – xaricdə kimin qalib olmasından asılı olmayaraq. Görərik, ən azından Trampın köməkçisi Mask və onun yaxın ətrafı Ukraynadakı müharibəyə mənfi münasibət bildirib. Hesab edirəm ki, bu münasibət dəyişməyəcək.
– Trampın qələbəsindən sonra ABŞ-ın Cənubi Qafqaz siyasəti necə olacaq?
– Azərbaycan da başa düşməlidir ki, Tramp pulları saymağı çox yaxşı bilir və Ermənistan siyasi isteblişmentini dəstəkləmək üçün ayrılan büdcələr, məncə, azalacaq, çünki Tramp regionda daha güclü oyunçuların olduğunu nəzərə alaraq, bunun faydasız xərc olduğunu yaxşı bilir. Bunlar Azərbaycan, Rusiya, Türkiyədir. Amerikalıların isə orada xüsusi bir işi yoxdur.
Məncə, erməni tərəfinin özü də, Zelenski kimi, artıq şokdadır, çünki onlar Amerika Birləşmiş Ştatlarının, daha doğrusu, Demokratlar Partiyasının vədləri və dəstəyi ilə qidalanırdılar. Buna görə də siz başa düşməlisiniz ki, Trampın gəlişi Cənubi Qafqazda regional siyasətin fundamental vəziyyətini dəyişəcək. Və çox güman ki, Rusiya və Azərbaycanın şərtləri ilə sülh müqaviləsinin imzalanması nəhayət ki, yaxınlaşacaq.