Mayın 18-i İran Premyer Liqasının 22-ci mövsümünün yekun oyunları çərçivəsində Tehranın “İstiqlal” futbol komandası ilə Təbrizin “Traktor” komandasının qarşılaşması olub.
AzerTimes xəbər verir ki, qalmaqallı qarşılaşma “İstiqlal”ın 7-1 hesablı qələbəsi ilə başa çatıb.
İranın bir sıra media orqanları bundan öncəki qarşılaşmada “Traktor”un “İstiqlal” üzərində 2-1 hesablı qələbəsinə toxunaraq, Təbriz komandasının məğlubiyyət xəbərini “Tehranın Təbrizdən ağır qisası”, “Azadi stadionu “Traktor”çuların xəyallarının qətlgahı” və başqa bu kimi başlıqlar altında dərc ediblər.
Həmçinin, dünənki qarşılaşmada “Traktor” komandasının 5 zədəli oyunçu ilə meydana çıxması mübahisə və müzakirələrə səbəb olub.
Qeyd edək ki, Premyer Liqanın 22-ci mövsümün sonunda Tehranın “Perspolis” komandası 66 xalla birinci, İsfahanın “Sepahan” komandası 65 xalla ikinci, Tehranın “İstiqlal” komandası 62 xalla üçüncü və Təbrizin “Traktor” komandası 52 xalla dördüncü yerləri tutublar.