Kliniki Tibbi Mərkəz Toksikologiya şöbəsinin müdiri Azər Maqsudovun törətdiyi qəza ilə bağlı məlumat yayıb.
Mərkəzdən AzerTimes-a verilən məlumata görə, ötən gün saat 23 radələrində Sabunçu rayonu ərazisində Bakı şəhər sakini Azər Spartak oğlu Maqsudov idarə etdiyi “Mersedes” markalı avtomobillə qəza törədib.
“Qəza 1956-cı il təvəllüdlü Arif Acaloğlunun yüksək sürətli avtomobil yolunun piyadalar üçün nəzərdə tutulmayan hissəsində avtomobilin qarşısına qəfil çıxması nəticəsində baş verib. Hadisədən dərhal sonra A.Maqsudov A.Acaloğlunu Sabunçu rayon mərkəzi xəstəxanasına aparıb. Həkimlərin səyinə baxmayaraq, onun həyatını xilas etmək mümkün olmayıb.
İstintaq tədbirləri nəticəsində A.Maqsudovun spirtli içki qəbul etməsi və narkotik vasitədən istifadə etməsini araşdırmaq üçün narkoloji dispanserdə müayinədən keçirilib. Onun bu kimi maddələrdən istifadə etmədiyi məlum olub” , – deyə məlumatda deyilir.
Qeyd edək ki, sözügedən qəza zamanı dünyasını dəyişən A.Acaloğlu tanınmış professordur.