Tanınmış etnoqraf Emil Kərimov bu gün 90 yaşında vəfat edib.
AzerTimes xəbər verir ki, bu barədə AMEA-nın Tarix İnstitutu məlumat yayıb.
Xatırladaq ki, E.Kərimov 1933-cü il mayın 15-də Qərbi Azərbaycanın İrəvan şəhərində anadan olub. 1948-ci ildə azərbaycanlılara qarşı kütləvi deportasiya nəticəsində Xanlar rayonuna köçürülüb.
O, 1960-1963-cü illərdə Rusiya Elmlər Akademiyasının Etnoqrafiya və Antropologiya İnstititunun aspirantı olub. 1963-cü ildən Azərbaycan Elmlər Akademiyasının Tarix İnstitutunda elmi işçi vəzifəsində işləyib.
E.Kərimov 5 monoqrafiyanın və 100-ə yaxın elmi məqalənin müəllifidir. O, bir sıra xarici ölkələrdə (Rusiya, Hindistan, İsrail, Gürcüstan, İran və s.) Azərbaycan etnoqrafiyasının aktual problemlərinə aid məruzələrlə çıxış edib.
E.Kərimovun etnoqrafiya ixtisası üzrə kadr hazırlanması işində xidmətləri də çox böyükdür. O, 2003-cü ildən 2023-cü ilin mart ayınadək Müasir dövr etnoqrafiyası şöbəsinə rəhbərlik edib.