STP şirkətlər qrupu bir neçə ildir həyata keçirdiyi istehsal sahələri üçün gənc istedadların yetişdirilməsinə dəstək olan növbəti, “STP Təcrübə Proqramı 2022” adlı ödənişli təcrübə layihəsinə start verir. Bu təcrübə proqramının başlıca məqsədi ali təhsilini yeni bitirmiş, iş təcrübəsi olmayan, lakin inkişafa meylli potensiallı gənclərin bilik və peşəkar karyera bacarıqlarının inkişaf etdirilməsinə dəstək olmaqdan ibarətdir.
Təcrübə proqramı STP şirkətlər qrupuna daxil olan 7 Şirkətdə, əsasən sənaye istehsalı və inzibatçılıq istiqamətində yerli və xarici mütəxəssislərin mentorluğu ilə müxtəlif peşə və ixtisasları əhatə edəcəkdir. Müəssisənin hər il keçirtdiyi Təcrübə proqramının əsas hədəfi yalnız iqtisadiyyatın əsas sütunlarından hesab edilən sənaye istehsalı üçün kadrların hazırlanması deyil, eyni zamanda sosial məsuliyyətini dərk edən və iqtisadiyyatın müxtəlif sahələrində dəyər yarada bilən üstün fərdi göstəricilərə malik insan resurslarının yetişdirilməsindən ibarətdir.
Xatırladaq ki, 2021-ci ildə STP Şirkətlər Qrupunun həyata keçirdiyi Təcrübə proqramına 4500-dən çox şəxs tərəfindən müraciət daxil olmuş, onlardan 400 nəfərədək uyğun namizəd müxtəlif online və offline seçim mərhələlərində iştirak etmişdir. Nəticə olaraq 19 müxtəlif peşə və ixtisas üzrə 40-a yaxın xüsusi fərqlənən gənc kadr 6 ay müddətində STP-nin müxtəlif profilli şirkətlərində ödənişli təcrübəyə cəlb edilmişdir.
Təcrübə proqramının hazırlığı və seçim prosesləri STP-nin peşəkar komanda heyəti ilə birlikdə təşkil edilmişdir. Təcrübə prosesinə isə təcrübə müddəti boyunca namizədlərdə peşəkar səriştələrin formalaşdırılması üçün STP-nin böyük təcrübəyə malik əməkdaşları arasından 20 mentor cəlb edilmişdir.
Ötən təcrübə proqramını uğurla başa vurmuş 24 məzunumuz hazırda ölkənin 7 müxtəlif şirkət və dövlət qurumunda öz fəaliyyətlərini mütəxəssis olaraq davam etdirir.
Sumqayıt Texnologiyalar Parkının 2022-ci il üçün yaratdığı bu təcrübə imkanından yararlanıb peşəkar komandasına qoşularaq regionun ilk və ən nəhəng sənaye texnoloji parkında karyerasının ilk addımlarını atmaq istəyən gənc kadrlar, 6 yanvar 2022-ci il tarixinədək internstp.com portalından qeydiyyatdan keçməklə istədiyi ixtisas üzrə təcrübə proqramına müraciət edə bilər. Qeyd edək ki, portal üzərindən edilməyən müraciətlər seçim prosesində nəzərə alınmayacaqdır.
STP Şirkətlər qrupu “STP Təcrübə Proqramı 2022” iştirakçılarına Azərbaycan Əmək məcəlləsinə uyğun iş şəraiti yaradır və müvafiq sənədləşmə aparır, həmçinin onları nəqliyyat və naharla da təmin edir.
Təcrübə proqramında elan edilmiş peşə və ixtisaslarla bağlı daha ətraflı məlumatları STP şirkətlər qrupunun rəsmi təcrübə portalından (internstp.com) və sosial şəbəkə səhifələrindən əldə etmək olar.