Ölkəmizin ilk milli uşaq markası olan “Shokki Mokki” “Xoşbəxt böyüyən sabahlar” şüarı ilə sosial məsuliyyət layihələrini reallaşdırmağa davam edir.
AzerTimes xəbər verir ki, 8 iyul tarixində “Xəyal adası”nda “Məktəbim” layihəsinin üzvləri ilə görüş keçirildi. Adı çəkilən marka UAFA təşkilatı ilə birlikdə “Məktəbim” layihəsi çərçivəsində aztəminatlı, ucqar ərazidə yaşayan və sağlamlıq imkanları məhdud olduğu üçün məktəbəqədər təhsilə çıxışı olmayan uşaqların təhsil ehtiyaclarını alternativ və dayanıqlı şəkildə təmin edir. “Məktəbim” sosial biznesi qadınlar tərəfindən idarə olunan, uşaq yönümlü, inklüziv məktəbəqədər təhsil proqramıdır.
Tədbirdə bir sıra tanınmış blogerlər, ictimai-siyasi və mədəni həyatda fərqlənən qadınlar iştirak edib, təcrübələrini paylaşıblar.
Görüş zamanı qeyd olunub ki, Azərbaycanda 2-6 yaş arası uşaqların yalnız 36%-i məktəbəqədər təhsilə cəlb olunur. Bu qeyri-bərabərlik xüsusilə kənd yerlərində və ucqar ərazilərdə yaşayan, həmçinin sağlamlıq imkanları məhdud uşaqlar arasında özünü büruzə verir. Məhz “Məktəbim” layihəsinin sayəsində ucqar ərazidə yaşayan, əlillik, aztəminatlılıq kimi sosial problemləri olan və məktəbəqədər təhsil imkanı olmayan uşaqlar indi təhsil ala bilirlər. Bu layihədə iştirak edən xanımlar öz təhsil bizneslərini qururlar. Onlara da UAFA tərəfindən məktəbəqədər təhsil üzrə təlimlər keçirilir.
Tədbirdə “Media Balans”ın rəqəmsal marketinq bölməsi tərəfindən xanımlara sosial medianın düzgün istifadə yolları barədə təqdimat nümayiş olunub. Sosial mediada yazılan postların vacib nüansları və digər önəmli sahələr haqqında ətraflı məlumat verilib.
Qeyd edək ki, UAFA-nın “Məktəbim” qrupları Bakı, Sumqayıt, Abşeron, Gəncə, Hacıqabul, Lənkəran, Şirvan, Zaqatala kimi şəhər və rayonlarda aktiv fəaliyyət göstərir. Bir il ərzində “Shokki Mokki”nin dəstəyi ilə ölkəmizin müxtəlif bölgələrində 24 “Məktəbim” təhsil ocağı yaradılıb ki, nəticədə yüzlərlə azyaşlının təhsil alması təmin edilib. Erkən təhsil mütəxəssisləri tərəfindən hazırlanan Pedaqoji Proqram bu ildən etibarən bütün “Məktəbim” qruplarında tətbiq ediləcək. Beynəlxalq “Addım-addım” yanaşması və milli kurikuluma əsaslanan və inklüziv öyrənməni təmin edən bu proqram, bütün uşaqların fərqli ehtiyaclarına doğru şəkildə yanaşaraq, onların gələckdə daha uğurlu bir fərd olmasına zəmin yaradacaq.