İran hökuməti Taliban və Əl-Qaidə ilə gizli anlaşma əsasında Əl-Qaidənin Əfqanıstandakı düşərgələrində təlim keçir və bu təşkilatın bölgədəki terror əməliyyatlarını maliyyələşdirir.
AzerTimes xəbər verir ki, bu barədə Əfqanıstan Birləşmiş Cəbhəsi məlumat yayıb.
“2021-ci ilin oktyabr ayında SEPAH-ın Qüds qüvvələrinin komandiri İsmayıl Qaani, Taliban hərəkatının nümayəndəsi və Əl-Qaidənin lideri Seyf əl-Ədl Tehranda gizli görüş keçirib, Yaxın Şərq və Afrikadakı Əl-Qaidə və SEPAH-a bağlı qrupların bütün qollarının bir-biri ilə əməkdaşlıq etmələri barədə razılığa gəldilər”, – məlumatda bildirilib.
Məlumata görə, bu gizli görüşdə Talibanın Əl-Qaidə döyüşçülərinin Əfqanıstanda yetişdirilməsi üçün lazımi məkan və vasitələrin təmin etməsi, SEPAH-ın isə bu qrupun xərclərini ödəməsi barədə razılıq əldə olunub.
Əfqanıstan Birləşmiş Milli Cəbhəsinin məlumatına görə, bu, SEPAH, Taliban və Əl-Qaidənin üç yüksək rütbəli rəsmisi arasında qeydə alınmış ilk üzbəüz görüş olub.
Qeyd edək ki, bundan əvvəl İran hökuməti ilə Əl-Qaidə arasında sıx əlaqə olduğuna dair məlumat yayılmışdı.