Xəbər - Çingiz Səfərli – Trend:
Ölkədə şəkərli diabet xəstələrinin dərmanlarla təminatında ciddi problemlər var.
AzerTimes xəbər verir ki, bunu Azərbaycan Diabet Cəmiyyətinin sədri Möminat Ömərova deyib.
Onun sözlərinə görə, hər gün bölgələrdən bununla bağlı əmiyyətə çoxlu sayda şikayətlər daxil olur.
“Xəstələr son dövrlərdə dərmanların sayının azaldılmasından gileylənirlər. Şəkərli diabetlə mübarizə üzrə 2 cür insulin var. qısamüddətli və uzunmüddətli. Xəstə bunların hər ikisini almalıdır. Amma deyirlər ki, bunlardan birini seçməlisiniz. Belə bir şey ola bilməz. Sonda bu, fəsadların yaranmasına gətirib çıxaracaq və bunun xərcini də yenə dövlət çəkməli olacaq. Çatdırılmada da müəyyən problemlər yaşanır və xəstələr insulini bəzi hallarda vaxtında ala bilmirlər. Nəhayət ən böyük problem keyfiyyətli insulinlərin keyfiyyətsiz insulinlərlə əvəz olunmasıdır” – deyə M.Ömərova qeyd edib.
Səhiyyə Nazirliyindən məsələyə aydınlıq gətirilib. Qurumdan AzerTimes-a verilən məlumata görə, şəkər dərmanları Nazirlər Kabinetinin müvafiq qərarına əsasən Səhiyyə Nazirliyinin İnnovasiya və Təchizat Mərkəzi tərəfindən xəstə sayına uyğun olaraq alınır və Tibbi Ərazi Bölmələrinin İdarəetmə Birliyinin tabeliyində olan tibb müəssisələrinə təqdim edilir.
“Dərman preparatlarının xəstələrə paylanması bu müəssisələr tərəfindən həyata keçirilir. Əlavə olaraq bildiririk ki, Səhiyyə Nazirliyi tərəfindən yeni hazırlanmış proqram layihəsində şəkərli diabetdən əziyyət çəkən xəstələrə verilən dərmanların adambaşına gündəlik 40 vahid əvəzinə bu rəqəmin 60 vahidə çatdırılması təklif edilib. Qeyd etmək istəyirik ki, Səhiyyə Nazirliyinin İnnovasiya və Təchizat Mərkəzi tərəfindən verilən dərman preparatları Səhiyyə Nazirliyinin Analitik Ekspertiza Mərkəzi tərəfindən yoxlanaraq sertifikat əldə etdikdən sonra vətəndaşların istifadəsi üçün tibb müəssisələrinə paylanılır”.
TƏBİB-dən də AzerTimes-a bildirilib ki, şəkərli diabet xəstəsinə insulin təyini Nazirlər Kabinetinin müvafiq qərarına əsasən tənzimlənir. Qərarla hər bir xəstə üçün vahid norma müəyyənləşib.
“Azərbaycan Respublikası Nazirlər Kabinetinin 13 may 2005 ci il tarixli 87 saylı qərarına əsasən hər bir şəkərli diabet xəstəsinə sutkalıq 40 vahid insulin yazılmalıdır. Bu analoq insulinlərdən ayda 4 qələm, digər insulinlərdən isə ayda 1 qələm düşür. Adi insulinləri isə xəstələr aya 1000 vahid, yəni ayda 1 ədəd, 5 aydan bir isə 2 ədəd yəni, 6000 vahid ala bilər. ( 40 vahid 30 gün =1200 vahid ×5 aya = 6000 vahid=5 flakon)” – deyə məlumatda qeyd olunub.
Qeyd edək ki, son məlumatlara görə, ölkədə şəkərli qeydiyyata alınan diabet xəstələrinin sayı 283 min nəfərdir. Dünyada isə şəkərli diabetdən əziyyət çəkənlər 537 milyon nəfər təşkil edir.
Twitter: @cingizsafarli