Bu gün Abşeron Rayon İcra Hakimiyyəti tərəfindən daha bir şəhid övladı sevindirilib. RİH başçısı İradə Gülməmmədovanın tapşırıq və tövsiyələrinə uyğun olaraq rayon ərazisində yaşayan şəhid ailələrinə böyük diqqət və qayğı göstərilir, onların övladlarına fərdi yanaşılaraq istək və arzuları dinlənilir. Bununla bağlı RİH tərəfindən həyata keçirilən “Hərəyə bir şəhid övladı sevindirək” layihəsi uğurla davam etdirilir. RİH-in əməkdaşı Seymur Qasımov layihə çərçivəsində görülən işlər barəsində danışarkən məlumat verib ki, şəhid İşiyev Rəfael Əhmədağa oğlunun həyat yoldaşı Sevda İşiyeva ilə əlaqə saxlanılıb, övladı Hüseynin istəkləri öyrənilib. Qəhrəmanımızın oğlunun mobil telefon (Samsung-A52) istədiyi müəyyən edilib.
Mobil telefon Xırdalan şəhər 27 saylı körpələr evi-uşaq bağçasının müdiri Samirə Məmmədova və Xırdalan şəhər 24 saylı körpələr evi-uşaq bağçasının müdiri Leyla Bayramova tərəfindən ailəyə təqdim edilib və beləliklə də şəhid övladının arzusu yerinə yetirilib.
Şəhidin həyat yoldaşı Sevda İşiyeva göstərilən diqqət və qayğıya görə təşəkkürünü bildirib. Bu layihə ilə uşaqların sevindirildiyini qeyd edərək həyata keçirilən müsbət əməlin əhəmiyyətindən danışıb.
Qeyd edək ki, gizir İşiyev Rəfail Əhmədağa oğlu 04.09.1979-cı ildə Cəlilabad şəhərində müəllim ailəsində anadan olub. 1996-cı ildə Cəlilabad şəhər 8 saylı məktəbi bitirib hərbi xidmətə yollanıb. 1998-ci ildə Murov dağda yerləşən N saylı hərbi hissədə hərbi tapşırıq yerinə yetirərkən R.İşiyev və digər 5 əsgər yoldaşı ilə birgə üstü qarla bağlı dərəyə düşərək 4 gün ac və susuz qalıb. Rəfail həyatının son dəqiqələrində tapılıb xilas olunub. Müalicə aldıqdan sonra, hərbi xidmətini bitirib evə qayıdıb. Bir neçə ildən sonra öz istəyi ilə yenidən hərbi kurslara yazlılıb. Bununla da həyatının 16 ilini hərbi xitdmətə həsr edib. İllərin təcrübəli mütəxəssisi, sürücü-mexanik olumuşdur. Öz işini çox sevən və işini peşəkarcasına bacaran insan olub. Rəfail ona verilmiş PDM(BMP)-sin xüsusi qayğıyla saxlayan şəxs idi. O, 499 nömrəli PDM-ini hər dəfə idarə etdikdə nəinki özü, hətta hərbi hissələrin şəxsi heyəti zövq ilə izləyirdi.
Rəfail peşəkarlığına görə bir neçə hərbi paradlarda iştirak etmişdir. Xüsusəndə Azərbaycan Silahlı Qüvvələrinə həsr olunmuş paradlarda iştirakına görə medallarla təltif olunmuşdur.
R.İşiyev 2016-cı ilin aprel döyüşlərinin iştirakçısı olub. 2-ci Qarabağ müharibəsində mübarək qanı ilə tarix yazanlardan biri olmağı bacarıb. Cəbrayıl rayonunun işğaldan azad olunması istiqamətində gedən döyüşlərdə onun idarə etdiyi 499 nömrəli BMP-sini düşmən tərəfindən vurulması nəticəsində yaralanır. Yaralanandan 2 gün sonra cəbhəyə qayıdan qəhrəmanımız öz istəyi ilə yaralı döyüş yoldaşının BMP-sini idarə edərək Fizuli istiqamətində gedən döyüşlərdə 2-ci dəfə ağır yaralanır. Hərbi hospitalda müalicə almasına baxmayaraq R.İşiyev yaralarını unudaraq yenidən döyüş meydanına qayıdır. Orada erməni qəniməti olan 3-cü BMP-ilə döyüşlərə qatılır. Noyabrın 3-ündə Xocavənd istiqamətində gedən döyüşlərdə böyük şücaət və qəhrəmanlıq göstərərək şəhidlik zirvəsinə ucalıb.
Hərbi xidməti dövründə xüsusi keyfiyyətlərinə, əməliyyatlarda göstərdiyi şücaətə görə bir çox medallarla təltif olunub. III dərəcəli “Qüsursuz xidmətə görə” medalı, “Azərbaycan Silahlı Qüvvələrinin 90 illiyi” yubiley medalı, “Azərbaycan Silahlı Qüvvələrinin 95 illiyi” yubiley medalı, “Azərbaycan Silahlı Qüvvələrinin 100 illiyi” yubiley medallarınıl alıb. Prezident İlham Əliyevin sərəncamı ilə R.İşiyev “Vətən uğrunda” medalına (ölümündən sonra), “İgidliyə görə” medalı, “Füzulinin azad olunmasına görə” medalına (ölümündən sonra), “Cəbrayılın azad olunmasına görə” medalına (ölümündən sonra), “Xocavəndin azad olunmasına görə” medalına, “Şuşanın azad olunmasına görə” medalına” layiq görülüb.
Allah rəhmət eləsin.