Rusiya Belarusa ikili təchiz olunmuş “İsgəndər-M” sistemlərini təhvil vermək niyyətində olduğunu və Su-25 hücum təyyarələrinin bir hissəsinin nüvə daşımaq üçün texniki imkanlara uyğunlaşdırılacağını açıqladı.
AzerTimes xəbər verir ki, bunu Ukraynanın keçmiş müdafiə naziri Andrey Zaqorodnyuk deyib.
“Onlar dedilər ki, Belarus təyyarələrinə nüvə başlığı daşımaq qabiliyyətini ötürə bilərlər. Bu o deməkdir ki, onlar Şərqi Avropa ölkələrini belə təhdid edirlər, Şərqi Avropa ölkələrinin qorxuya düşəcəyini gözləyirlər. İndi Rusiya nəyin bahasına olursa olsun, Ukraynanı danışıqlar masası arxasına oturtmaq istəyir. Rusiyada indi hər şey bir ideyaya tabedir: gəlin, birtəhər Ukraynanı danışıqlar masası arxasına qoyaq. Hələlik onların etdikləri hər şey sırf buna yönəlib, çünki onlar artıq tükəniblər, hər hansı hücumu davam etdirmək üçün kifayət qədər gücləri yoxdur. Ruslar həm də görürlər ki, Ukraynanın əks-hücum hərəkətləri etmək gücü var, onlar Ukraynanı dayandıra bilmirlər və bu yolla yekun məğlubiyyəti təxirə salmağa çalışırlar”, – ekspert bildirib.
Zaqorodnyuk qeyd edib ki, Rusiya nüvə şantajını davam etdirməklə yanaşı, qüvvələrini artırmaq üçün yol axtarır:
“Onlara dincəlmək, güclərini artırmaq, az-çox güclü ordu bölmələri hazırlamaq, səfərbər edilmişləri bərpa etmək və təlim etmək üçün vaxt lazımdır”.