Ukrayna müharibəsi başlayandan bu yana ilk dəfə “ac və dərmansız” olduqlarını iddia edən rus əsgərləri kameralar qarşısına keçərək Rusiya Prezidenti Putinə üsyan ediblər. Sosial mediada geniş əks-səda doğuran videoda rota komandiri “Əsgərləri ölümə göndərməkdən nə qazanılır?” sualını verib.
AzerTimes xəbər verir ki, aylardır vaxtaşırı gündəmə rus əsgərlərinin Ukraynada yaşadıqları bəlalardan şikayətlənməsi, əmrlərə tabe olmaması və silahlarını yerə qoymasına dair məlumatlar gəlir.
Teleqramda yayımlanan kadrlarda əsgərlər separatçı “dxr”in 113-cü atıcı alayından olduqlarını, Ukraynaya döyüşmək üçün göndərildiklərini qeyd edirlər. Putinə müraciət edən əsgərlər aylardır ki, dərmansız və ərzaqsız qaldıqlarını bildirirlər.
Əsgərlərinin lazımi avadanlıq və tibbi xidmətlə təmin olunmadığını deyən rota komandiri heç bir şəkildə hərbi xidmətə çağırılmamalı olan xroniki xəstəlikləri olan kişilərin müharibənin ortasına atıldığını iddia edib:
“113-cü atıcı alayın 5-ci piyada batalyonu Ukraynanın Xerson vilayətində ön cəbhədə olub. Maddi yardım, tibbi ləvazimat və yeməksiz bir müddət döyüşə bildik. Əsgərlər heç bir tibbi müayinədən keçmədən döyüş meydanına göndəriliblər. Bizim batalyonda elə adamlar var ki, “donetsk xalq respublikasının” qanunlarına görə əsgərliyə getməməlidir. Xroniki xəstəlikləri, psixi problemləri olan insanlar var. Zabitlərinizə hörmət edin. Əsgərlərinizi ölümə göndərməkdən nə əldə edirsiz?”
Sonra digər əsgərlər də şikayətlərini bildiriblər.
Ali komandanlıq isə onların şikayətlərini təxribat kimi qiymətləndirib.
Qeyd edək ki, sosial mediada geniş əks-səda doğuran videoçarx Donbasda şiddətli və qanlı qarşıdurmaların getdiyi bir zamanda ortaya çıxıb.