“Mançester Yunayted” futbol klubunun portuqaliyalı hücumçusu
Kriştiano Ronaldo peşəkar karyerasında vurduğu qolların sayına görə
dünya rekorduna imza atıb.
Trend xəbər verir ki, İngiltərə çempionatının 29-cu turu
çərçivəsində keçirilən “Mançester Yunayted” – “Tottenhem” matçında
Ronaldo het-trik edib. Bu qollar futbolçunun peşəkar karyerası
ərzində rəsmi görüşlərdə vurduğu 805, 806 və 807-ci qollar olub.
Oyun 3:2 hesabı ilə “Mançester Yunayted”in xeyrinə başa çatıb.
Belə ki, Ronaldo 805 qol vuran avstriyalı-çexiyalı hücumçu Yozef
Bitsanın rekordunu yeniləyib. Bunu FİFA məlumatları da daxil
olmaqla, rəsmi statistik mənbələr göstərir.
37 yaşlı Ronaldo müvafiq olaraq “Mançester Yunayted”, “Real
Madrid” və “Yuventus”la dəfələrlə İngiltərə, İspaniya və İtaliya
çempionu olub. Portuqaliya millisi ilə Avropa Çempionatının və UEFA
Millətlər Liqasının qalibi olub.