“Rabitəbank” ASC bir neçə ay öncə ən yaxşı təcrübəni tətbiq etmək məqsədi ilə riteyl əməkdaşlarının universallaşdırılması istiqamətində “Müştəri təmsilçisi” layihəsinə start verib. Layihə direktor, rəhbər, menecer və ekspertlərin mentorluğu ilə 5 həftəlik əsas təlimləri əhatə edir. Təlimlərdə əməliyyat və kredit sahəsi üzrə ümumi 225 əməkdaş iştirak edib. Təlimlərdə mentorlar iştirakçıları xidmət keyfiyyətinin yüksəldilməsi, müştəri məmnuniyyətinin artırılması, kommunikasiya prosesinin müxtəlif aspektləri və effektivliyinə dair real praktiki misallarla əsaslandırılmış məlumatlarla təchiz edib, onlara öz aralarında və mentor ilə fikir mübadiləsi aparmağa imkan yaradıb.
Təlim proqramını tamamlamış əməkdaşlar artıq universal işçi kimi yetişərək “Müştəri təmsilçisi” sertifikatları ilə təmin olunublar. Universal müştəri təmsilçisi kimdir? Artıq filiala yaxınlaşan müştəri müraciət sorğusundan asılı olmayaraq istənilən əməliyyatçıdan dəstək ala biləcək. Bir əməliyyatçı, həm fərdi istehlak, həm biznes, həm kart və digər bank xidmətləri ilə tam məlumatlanmış təmsilçiyə çevrilib.
Qeyd edək ki, Rabitəbank müştəri yönümlülük və dayanıqlı işkişaf dəyərlərinə uyğun olaraq bundan sonra da dünya təcrübəsi və innovasiyaların tətbiqini davam etdirəcək, əməkdaşların davamlı inkişafı üçün həm üzbəüz, həm də onlayn istiqamətdə fəaliyyətlərini genişləndirəcək.
“Rabitəbank” ASC, Azərbaycanın 16 regionu və Bakı şəhərində 27 xidmət məntəqəsi və 73 ATM-i, “Rabita Mobile” tətbiqi, İnternet Bankçılıq platforması və “RabitaBot” çatbotu, 133 nömrəli Çağrı Mərkəzi ilə müştərilərin xidmətindədir.