Qırğızıstan parlamenti respublikanın birinci başçısı Əsgər Akayevə eks-prezident statusunu bərpa etməkdən imtina edib.
AzerTimes xəbər verir ki, bu barədə Qırğızıstan mətbuatı məlumat yayıb.
“Parlament bu qərarı dəstəkləyib və Əsgər Akayevin müvəqqəti deputat komissiyasının yaradılması barədə ərizəsini təmin etməkdən imtina edib. Qərar səs çoxluğu ilə qəbul edilib, 71 deputat statusun bərpasından imtina edib, iki nəfər razı olub”, – məlumatda deyilir.
Qeyd edək ki, Qırğızıstanın ilk dövlət başçısı Akayev sentyabrın əvvəlində qanunvericilik məclisinə müraciət edərək, ona prezidentlik dönəmində törətdiyi əməllərə görə təqib olunmaqdan qoruyan, hazırkı liderin maaşının 75%-i miqdarında pensiya almaq hüququ, ömürlük dövlət mühafizəsi və digər imtiyazlar verən “keçmiş prezident statusu”nu qaytarmasını istəmişdi.