Xəbər - Samir Əli – Trend:
Ailə, Qadın və Uşaq problemləri üzrə Dövlət Komitəsi Bakıda qayınatası tərəfindən doğranaraq qətlə yetirilən qadının iki azyaşlı övladının nəzarətə götürüb.
Bu barədə AzerTimes-a açıqlamasında komitənin Mətbuat xidmətinin rəhbəri Teymur Mərdanoğlu deyib. O bildirib ki, hadisə baş verən gün komitə dərhal məsələ ilə maraqlanıb və məsələni nəzarətə götürüb:
“Bu hadisə hər birimizi kədərləndirir, gənc ananın xüsusi amansızlıqla qətlə yetirilməsi və iki azyaşlı övladının valideynsiz qalmasından təəssüflənirik. Komitə bu hadisə ilə bağlı araşdırmalar aparıb və anasını itirən iki azyaşlını mütəmadi nəzarətdə saxlayır. Hazırda iş üzrə istintaq gedir və uşaqlar ata nənəsinin himayəsindədir. İstintaq başa çatandan sonra əgər ehtiyac yaranarsa, uşaqlar ailədən alınıb dövlət himayəsinə veriləcək”.
Qayınatası gəlinini doğrayıb bu zibilliyə atıb – Hadisə yerindən görüntülər (FOTO/VİDEO)
Xatırladaq ki. yanvarın 27-də saat 01 radələrində Nəsimi rayonu 4-cü mikrorayon ərazisində yerləşən məişət tullantılarının atılması üçün nəzərdə tutulmuş zibil qutularında 5 ədəd torbada doğranmış vəziyyətdə naməlum qadın meyitinin hissələrinin aşkar edilməsi faktı ilə bağlı Nəsimi rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə başlanmış cinayət işi üzrə intensiv istintaq hərəkətləri və əməliyyat-axtarış tədbirləri həyata keçirilib.
Təxirəsalınmaz istintaq-əməliyyat tədbirləri nəticəsində aşkar edilmiş naməlum qadın meyitinin 1989-cu il təvəllüdlü Məhərrəmova Banı Xudayar qızı olması müəyyən edilib.
Prokurorluq və polis əməkdaşları tərəfindən peşəkarlıqla birgə həyata keçirilmiş tədbirlər nəticəsində zərərçəkmişin qayınatası 1946-cı il təvəllüdlü İdris Məhərrəmovun gəlini Banı Məhərrəmova ilə ailə məişət zəminində mübahisə zamanı sonuncunun baş nahiyyəsindən çəkiclə vurub çoxsaylı bıcaq zərbələri yetirərək onu xüsusi amansızlıqla qəsdən öldürməsinə, daha sonra mətbəx bıçağı və balta ilə meyiti ayrı-ayrı hissələrə parçalayaraq torbalara yığıb məişət tullantılarının atılması üçün nəzərdə tutulmuş zibil qutularına atmasına əsaslı şübhələr müəyyən edilib.
29 yanvar 2021-ci il tarixdə İdris Məhərrəmov Cinayət Məcəlləsinin 120.2.4 (xüsusi amansızlıqla və ya ümumi təhlükəli üsulla adam öldürmə) və 245-ci (qəbir və ya meyit üzərində təhqiredici hərəkət) maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.
Hazırda iş üzrə zəruri istintaq-əməliyyat tədbirləri davam etdirilir.