“Olimpiakos”un müdafiəçisi Pape Sisse Avropa Liqasının qrup mərhələsinin 3-cü turunda “Qarabağ”la oyunda (0:3) əvəzləndikdən sonra verdiyi pis reaksiyaya görə klubdakı hərkəsdən və azarkeşlərdən üzr istəyib.
AzerTimes Qol.az-a istinadən xəbər verir ki, seneqallı oyunçu “Qarabağ”la matçın 83-cü dəqiqəsində ikinci qoldan bir dəqiqə sonra əvəzlənib. , Meydandan çıxarkən etdiyi səhvinə görə azarkeşlər onu fitə basıblar.
P.Sisse özünün Feysbuk hesabında yazıb: “Dünən “Olimpiakos” və mənim üçün çox pis bir gecə oldu. Son vaxtlar faciəvi itkilərlə şəxsi cəhənnəmi yaşadım və psixoloji sınaqlardan keçdim. Siz məni yaxşı tanıyırsınız. Futbol oynayaraq böyüdüyüm və meydanda hər zaman əlimdə olan hər şeyi verdiyim “Olimpiakos”u nə qədər çox sevdiyimi bilirsiniz. Dünən səhv etdim, özüm və ailəm haqqında sərt və təhqiramiz sözlər eşidib özümü itirdim. Buna görə bütün “Olimpiakos” ailəsindən, məşqçilərdən, komanda yoldaşlarımdan, rəhbərlikdən və hər şeydən əvvəl azarkeşlərdən üzr istəmək istəyirəm. Ümid edirəm ki, məni bağışlayacaqsınız, çünki bütün bu illər ərzində sizlərdən biriyəm və komandamız üçün hər şeyi verməyə davam etmək, tükənməz istəklə davam etmək istəyirəm”.
Qeyd edək ki, Sisse “Qarabağ”la görüşdə əvəzlənən zaman ona deyilən sözləri eşitmək üçün forması ilə qulaqlarını örtüb və fanatları söyüb.