Rusiya Prezidenti Vladimir Putinin bütün sağlamlıq sirlərini bilən aparıcı həkimlərdən biri qaçmaq istəyərkən saxlanıldıqdan sonra ölkənin xüsusi xidmət orqanları tərəfindən həbs edilib.
AzerTimes xəbər verir ki, bu barədə “Sun” nəşri yazıb.
Məlumata görə, 59 yaşlı Viktor Truxin 11 ildir işlədiyi Sankt-Peterburq Elmi-Tədqiqat Peyvəndlər və Zərdablar İnstitutunun direktoru vəzifəsindən dələduzluq ittihamı ilə qovulub.
Nəşr bildirib ki, Truxin Belarus vasitəsilə ölkədən qaçmaq istəyərkən FTX-nin əks-kəşfiyyat xidməti tərəfindən tutulub:
“O, peyvəndlər, zərdablar və bakterial preparatlar sahəsində ən son Rusiya tədqiqatları və inkişafı haqqında tam məlumatlıdır. Onun rəhbəri olduğu institut ölkənin radiasiya, kimyəvi və bioloji təhlükəsizliyini təmin etmək, habelə sağlamlığın qorunmasına rəhbərlik etmək üçün nəzərdə tutulan Federal Tibbi-Bioloji Agentliyin tərkibinə daxildir. Agentlik bildirib ki, korrupsiya ilə bağlı araşdırma aparıldıqdan sonra onun dələduzluqda iştirakı ilə bağlı dosye Rusiya hüquq-mühafizə orqanlarına təhvil verilib”.
Məlumatda qeyd olunub ki, Truxinin Rusiyanı tərk etmək niyyətində olduğu və rus peyvəndləri və zərdabları haqqında çoxlu maraqlı şeylər danışa biləcəyi məlum olduqdan sonra ona qarşı cinayət işi açılıb.
Onun Nikaraqua pasportu olduğu bildirilir.
Rusiya mətbuatı isə yazıb ki, Truxin o, təxminən 5,000 funt sterlinq pul mənimsəmək ittihamı ilə həbs olunub.
Bildirilib ki, Truxinin qızı onu sonuncu dəfə sentyabrın 3-də Moskvada görüb.